സുല്‍ത്താന്‍ ബത്തേരി: കട്ടയാട് പ്രദേശത്ത് കാട്ടാന വ്യാപകമായി വാഴ കൃഷി നശിപ്പിച്ചു. പ്രദേശവാസികളായ ഇളയില്‍ ചന്ദ്രന്‍, കട്ടയാട് വെളുത്ത എന്നവരുടെ 2500ഓളം വാഴകളാണ് കഴിഞ്ഞദിവസങ്ങളില്‍ ഇറങ്ങിയ കാട്ടാനകള്‍ നശിപ്പച്ചത്. ഇളയില്‍ ചന്ദ്രന്റെ രണ്ട് ഏക്കര്‍ ഭൂമിയിലെ വാഴകളും നശിപ്പിച്ചു. സമീപത്തെ വനത്തില്‍ നിന്നുമാണ് കാട്ടാനകള്‍ കൃഷിയിടത്തില്‍ ഇറങ്ങുന്നത്. ആനയിറങ്ങിയത് അറിഞ്ഞ് ഓടിക്കാനെത്തുന്നവര്‍ക്കുനേരെ കാട്ടാന ഓടിയടുക്കുന്നതും പതിവാണെന്നും കര്‍ഷകര്‍ പറയുന്നു. കാട്ടാനകള്‍ കൃഷിയിടങ്ങളില്‍ ഇറങ്ങുന്നതിന് പരിഹാരം കണ്ടില്ലെങ്കില്‍ ശക്തമായ പ്രക്ഷോഭവുമായി രംഗത്തുവരുമെന്നാണ് കര്‍ഷകരുടെ മുന്നറിയിപ്പ്.