നെടുമ്പാശ്ശേരി: കുടകള്‍ക്കകത്ത് ഒളിപ്പിച്ച് കടത്താന്‍ ശ്രമിച്ച 31 ലക്ഷം രൂപയുടെ സ്വര്‍ണം അന്താരാഷ്ട്ര വിമാനത്താവളത്തില്‍ കസ്റ്റംസ് എയര്‍ ഇന്റലിജന്‍സ് വിഭാഗം പിടികൂടി.
മസ്‌കറ്റില്‍ നിന്നും ഒമാന്‍ എയര്‍വെയ്‌സ് വിമാനത്തില്‍ നെടുമ്പാശ്ശേരിയിലെത്തിയ കോഴിക്കോട് സ്വദേശിയാണ് പിടിയിലായത്. 998.50 ഗ്രാം സ്വര്‍ണമാണ് ഇയാളില്‍ നിന്നും പിടികൂടിയത്. കമ്പി രൂപത്തിലാക്കിയ സ്വര്‍ണം നാല് കുടകള്‍ക്കുള്ളില്‍ ഒളിപ്പിച്ചാണ് ഇയാള്‍ കടത്താന്‍ ശ്രമിച്ചത്.
കുടകളുടെ നടുവിലെ ഫ്രെയിമുകള്‍ക്കുള്ളിലും കുട കമ്പി രൂപത്തിലുമാണ് സ്വര്‍ണം ഒളിപ്പിച്ചിരുന്നത്.
ഗ്രീന്‍ ചാനല്‍ വഴി പുറത്തിറങ്ങിയ ഇദ്ദേഹത്തെ സംശയം തോന്നി ചോദ്യം ചെയ്ത ശേഷം നടത്തിയ വിശദമായ പരിശോധനയിലാണ് ലഗേജിനകത്ത് നിന്നും സ്വര്‍ണം ഒളിപ്പിച്ച കുടകള്‍ കണ്ടെടുത്തത്. കസ്റ്റംസ് കമ്മിഷണര്‍ സുമിത് കുമാര്‍, അഡീ.കമ്മിഷണര്‍ എസ്. അനില്‍കുമാര്‍ എന്നിവര്‍ പരിശോധനക്ക് നേതൃത്വം നല്‍കി.