പറവൂര്‍: ജില്ലാ കോര്‍ട്ട് ബാര്‍ അസോസിയേഷന്‍ ഭരണ സമിതി തെരഞ്ഞെടുപ്പില്‍ കെ.പി.സി.സി സെക്രട്ടറി നയിക്കുന്ന പാനലില്‍ സംഘ് പരിവാര്‍ സംഘടനയായ അഭിഭാഷക പരിഷത്തിന്റെ നേതാക്കളെ കുടി ഉള്‍പ്പെടുത്തി മത്സരിക്കുന്നത് വിവാദമാകുന്നു.
ദേശീയ തലത്തില്‍ കോണ്‍ഗ്രസ് ബി.ജെ.പിക്കെതിരേ മതേതര കക്ഷികളുടെ പിന്തുണ ആര്‍ജിക്കാന്‍ ശ്രമിക്കുമ്പോഴാണ് പറവൂരില്‍ സംസ്ഥാന നേതാവ് തന്നെ അവിശുദ്ധ കൂട്ടുകെട്ടിന് നേതൃത്വം കൊടുക്കുന്നതെന്നതും ശ്രദ്ധേയമാണ്. ഇത് കോണ്‍ഗ്രസ് പ്രവര്‍ത്തകരിലും യു.ഡി.എഫ് അനുഭാവികളിലും ശക്തമായ പ്രതിഷേധത്തിന് ഇടയാക്കിയിട്ടുണ്ട്.
ബാര്‍ അസോസിയേഷന്‍ മുന്‍ പ്രസിഡന്റും കെ.പി.സി.സി സെക്രട്ടറിയുമായ അഡ്വ. എം.വി പോള്‍ പ്രസിഡന്റായി മത്സരിക്കുന്ന പാനലില്‍ ബി.ജെ.പി അഭിഭാഷക സംഘടനയായ അഭിഭാഷക പരിഷത്തിന്റെ യൂണിറ്റ് ഭാരവാഹി അഡ്വ തോമസ് മാത്യു ആണ് വൈസ് പ്രസിഡന്റ് സ്ഥാനാര്‍ഥി. മറ്റൊരു ഭാരവാഹിയായ അഡ്വ. ബിജു വര്‍മ കൗണ്‍സിലറായും മത്സരിക്കുന്നു. കഴിഞ്ഞ തെരഞ്ഞെടുപ്പില്‍ കോണ്‍ഗ്രസ്, എല്‍.ഡി.എഫ് പാനല്‍ കൂടാതെ അഭിഭാഷക പരിഷത്തിലെ മൂന്നു പേര്‍ മത്സരിച്ചിരുന്നെങ്കിലും പരാജയപ്പെട്ടിരുന്നു.
എല്‍.ഡി.എഫിലെ ഒന്‍പത് പേരും കോണ്‍ഗ്രസ് പാനലിലെ രണ്ടു പേരുമാണ് വിജയിച്ചത്. കോണ്‍ഗ്രസ് നേതാക്കളുടെയും പ്രവര്‍ത്തകരുടെയും എതിര്‍പ്പ് വകവെക്കാതെയാണ് അവിശുദ്ധ പാനല്‍ രൂപീകരിച്ചിട്ടുള്ളത്. അഭിഭാഷകരുടെ വാട്‌സ്ആപ് ഗ്രൂപ് ഉള്‍പ്പെടെ സോഷ്യല്‍ മീഡിയകളിലും ചര്‍ച്ച ചൂട് പിടിച്ചതോടെ മത്സരത്തിന് വീറും വാശിയും ഏറിയിരിക്കുകയാണ്. നിലവിലെ പ്രസിഡന്റ് അഡ്വ റാഫേല്‍ ആന്റണിയാണ് ഇടതുപാനല്‍ നയിക്കുന്നത്. ബുധനാഴ്ചയാണ് തെരഞ്ഞെടുപ്പ്.