തിരുവനന്തപുരം: കോഴിക്കോട് ഫാറൂഖ് ട്രെയിനിങ് കോളജിലെ അധ്യാപകന്‍ ഡോ.ജൗഹറിന് എതിരേ പൊലിസ് കേസെടുത്തത് മൗലികാവകാശ ലംഘനമാണെന്ന് നിയമസഭയില്‍ പ്രതിപക്ഷം. കെ.എം ഷാജിയാണ് വിഷയം സബ്മിഷനായി സഭയില്‍ ഉന്നയിച്ചത്.
വിഷയത്തില്‍ ഇടപെട്ടു സംസാരിച്ച പ്രതിപക്ഷ നേതാവ് രമേശ് ചെന്നിത്തല രാജ്യത്ത് അഭിപ്രായം പറയുന്നതിന് ആര്‍ക്കും സ്വാതന്ത്ര്യമുണ്ടെന്നും വിവാദ വിഷയത്തിന്റെ വസ്തുതയറിയാന്‍ പരിശോധന നടത്തണമെന്നും പറഞ്ഞു.
ഒരു മതത്തിന്റെ കാഴ്ചപ്പാട് അനുസരിച്ചുള്ള വസ്ത്രധാരണരീതി ആ മതസമൂഹത്തിനുള്ളിലെ ഒരു വേദിയില്‍ പോലും പറയാന്‍ കഴിയാത്ത സ്ഥിതിയാണെന്ന് കെ.എം ഷാജി പറഞ്ഞു. ഇഷ്ടമുള്ള മതം സ്വീകരിക്കാനും അതിന്റെ ആശയം പ്രചരിപ്പിക്കാനും ഭരണഘടന സ്വാതന്ത്ര്യം നല്‍കുന്നുണ്ട്. തീര്‍ത്തും നിരുദ്രപവകരമായ ഒരു പരാമര്‍ശത്തിന്റെ പേരില്‍ ഇങ്ങനെ കേസെടുക്കാന്‍ തുടങ്ങിയാല്‍ പരാതികളുടെ പ്രളയമായിരിക്കുമെന്നും ഇത്തരം വിഷയങ്ങള്‍ സൂക്ഷ്മതയോടെ കൈകാര്യം ചെയ്യണമെന്നും കെ.എം ഷാജി പറഞ്ഞു.
സംഭവത്തെ കുറിച്ച് വകുപ്പുതല അന്വേഷണം നടത്താന്‍ കോളജ് വിദ്യാഭ്യാസ ഡയറക്ടര്‍ക്ക് നിര്‍ദേശം നല്‍കിയെന്ന് മന്ത്രി എ.കെ ബാലന്‍ അറിയിച്ചു. അന്വേഷണം നടക്കുന്നുണ്ടെങ്കിലും അധ്യാപകനെ അറസ്റ്റ് ചെയ്തിട്ടില്ലെന്നും മന്ത്രി മറുപടി നല്‍കി.