തിരുവനന്തപുരം: ഇന്ദ്രന്‍സ് മികച്ച നടന്‍ മാത്രമല്ല, നല്ലൊരു മനുഷ്യന്‍ കൂടിയാണെന്ന് പ്രശസ്ത സിനിമാ സംവിധായകനും ഗാനരചയിതാവുമായ ശ്രീകുമാരന്‍ തമ്പി.
ഇന്ദ്രന്‍സിന് മികച്ച നടനുള്ള സംസ്ഥാന പുരസ്‌കാരം നേടിക്കൊടുത്ത വി.സി അഭിസാഷിന്റെ ആളൊരുക്കം എന്ന സിനിമയുടെ ഓഡിയോ സിഡി പ്രകാശനം പ്രസ്‌ക്ലബില്‍ നിര്‍വഹിക്കുകയായിരുന്നു അദ്ദേഹം. സാധാരണ മികച്ച നടന് നല്ല മനുഷ്യനാകാന്‍ പ്രയാസമാണ്. നല്ല മനുഷ്യന് നടനാകാനും പാടാണ്. എന്നാല്‍ അഭിനയത്തോടൊപ്പം നല്ല മനുഷ്യനായി ജീവിക്കുന്ന അപൂര്‍വം വ്യക്തിത്വങ്ങളില്‍ ഒരാളാണ് ഇന്ദ്രന്‍സെന്നും അദ്ദേഹം പറഞ്ഞു.
സംവിധായകന്‍ ഷിബു ഗംഗാധരന്‍ ഓഡിയോ സിഡി ഏറ്റുവാങ്ങി. താരപ്രഭയില്‍ നിന്നും അവാര്‍ഡുകള്‍ സാധാരണ കലാകാരന്‍മാരിലേക്കെത്തുന്നത് അങ്ങേയറ്റം അഭിനന്ദനാര്‍ഹമാണെന്ന് സിനിമയിലെ ഗാനമാലപിച്ച വിദ്യാധരന്‍ മാസ്റ്റര്‍ പറഞ്ഞു.
സംവിധായകന്‍ വി.സി അഭിലാഷ്, സംഗീത സംവിധായകന്‍ റോണി റാഫേല്‍, ഗാനരചയിതാക്കളായ അജേഷ് ചന്ദ്രന്‍, ഡി. യേശുദാസ്, നിര്‍മാതാവിന്റെ മകള്‍ പ്രവീണാ ജോളി, വര്‍ഗീസ് ഫെര്‍ണാണ്ടസ്, കിഷോര്‍ നായര്‍ സംസാരിച്ചു. ജോളിവുഡ് മൂവീസിന്റെ ബാനറില്‍ ജോളിലോനപ്പന്‍ നിര്‍മിക്കുന്ന ആളൊരുക്കം ഈ മാസം 29ന് തിയറ്ററിലെത്തും.