കൊച്ചി: വിദേശത്ത് പഠിക്കാന്‍ കേരളത്തിലെ വിദ്യാര്‍ഥികള്‍ ഏറ്റവും കൂടുതല്‍ തിരഞ്ഞെടുക്കുന്ന കോഴ്‌സുകള്‍ എം.ബി.എയും എന്‍ജിനീയറിങ്ങും നഴ്‌സിങ്ങുമാണെന്ന് സര്‍വേ റിപ്പോര്‍ട്ട്. അറുപത്തിയഞ്ചു ശതമാനം വിദ്യാര്‍ഥികളും ബിരുദാനന്തര ബിരുദ കോഴ്‌സുകള്‍ക്കാണ് വിദേശത്തു പഠിക്കാന്‍ അപേക്ഷ നല്‍കുന്നത്.
വെറും 17ശതമാനമാണ് ബിരുദ കോഴ്‌സുകള്‍ക്ക് അപേക്ഷിക്കുന്നത്. പി.ടി.ഇ അക്കാദമിക്കിനു വേണ്ടി പിയേഴ്‌സണ്‍ നടത്തിയ പഠനത്തിലാണ് ഈ കണ്ടെത്തല്‍. വിദേശത്തെ പഠനത്തിനും കുടിയേറ്റത്തിനുമുള്ള കംപ്യൂട്ടര്‍ അധിഷ്ഠിത ഇംഗ്ലീഷ് പ്രൊഫിഷ്യന്‍സി ടെസ്റ്റായ പി.ടി.ഇ.എ. ബിസിനസ് മാനേജ്‌മെന്റ് കോഴ്‌സുകള്‍ക്ക് 25.8 ശതമാനംപേര്‍ അപേക്ഷിക്കുമ്പോള്‍ 25.3 ശതമാനം പേര്‍ എന്‍ജിനീയറിങ് പഠനം തിരഞ്ഞെടുക്കുന്നു. നഴ്‌സിങ് രജിസ്‌ട്രേഷനായി പി.ടി.ഇ.എ ടെസ്റ്റിന് അപേക്ഷിക്കുന്നവരുടെ എണ്ണം കഴിഞ്ഞ 12 മാസക്കാലത്ത് ഗണ്യമായി വര്‍ധിച്ചിട്ടുണ്ടെന്ന് സര്‍വേ പറയുന്നു.