കാസര്‍കോട്: അടുത്ത മാസം 17 മുതല്‍ 21 വരെ ദുബൈയില്‍ നടക്കുന്ന ഏഴാമത് അന്താരാഷ്ട്ര അറബിക് സമ്മേളനത്തില്‍ ഗവേഷണ പ്രബന്ധം അവതരിപ്പിക്കുന്നതിന് കാസര്‍കോട് ഗവ. കോളജ് പി.ജി അറബിക് വിഭാഗം അസി. പ്രൊഫ. പി.കെ സുഹൈലിന് ക്ഷണം. ദുബൈ ഭരണാധികാരി ശൈഖ് മുഹമ്മദ് ബിന്‍ റാഷിദ് അല്‍ മഖ്തൂം രക്ഷാധികാരിയായ സമ്മേളനം, ഇന്റര്‍നാഷണല്‍ അറബിക് കൗണ്‍സില്‍, യുനെസ്‌കോ, അറബ് യൂനിവേഴ്‌സിറ്റീസ് യൂനിയന്‍ എന്നിവ സംയുക്തമായാണ് സംഘടിപ്പിക്കുന്നത്. അഞ്ചു ദിനങ്ങളില്‍ 130 സെഷനുകളിലായി എഴുപതോളം രാഷ്ട്രങ്ങളില്‍ നിന്നുള്ള പ്രതിനിധികള്‍ പങ്കെടുക്കുന്ന സമ്മേളനത്തില്‍ കേരളത്തിലെ പൊതുവിദ്യാലയങ്ങളിലെ അറബി പഠനത്തെക്കുറിച്ച് സുഹൈല്‍ പ്രബന്ധം അവതരിപ്പിക്കും. സംസ്ഥാന അറബിക് പാഠപുസ്തക സമിതി, കണ്ണൂര്‍ യൂനിവേഴ്‌സിറ്റി ബോര്‍ഡ് ഓഫ് സ്റ്റഡീസ് എന്നിവയില്‍ അംഗമായി പ്രവര്‍ത്തിച്ചിട്ടുള്ള ഇദ്ദേഹം തളിപ്പറമ്പ് തിരുവട്ടൂര്‍ സ്വദേശിയാണ്.