സിഡ്‌നി: ആസ്‌ത്രേലിയന്‍ താരങ്ങളുടെ ബോള്‍ ചുരണ്ടല്‍ വിവാദ താരങ്ങള്‍ക്കെതിരേ കൂടുതല്‍ കടുത്ത നടപടികളുണ്ടായേക്കും. അതേസമയം പരിശീലകന്‍ ലീമാനെതിരേ നടപടിയില്ലെന്ന് ആസ്‌ത്രേലിയന്‍ ക്രിക്കറ്റ് ബോര്‍ഡ്. കുറ്റക്കാരെ കണ്ടെത്തുന്നതിനും അന്വേഷിച്ച് റിപ്പോര്‍ട്ട് സമര്‍പ്പിക്കുന്നതിനുമായി ആസ്‌ത്രേലിയന്‍ ക്രിക്കറ്റ് അസോസിയേഷന്‍ സമിതിയെ നിയോഗിച്ചിട്ടുണ്ട്. സമിതി നല്‍കുന്ന റിപ്പോര്‍ട്ടിലായിരിക്കും ബോര്‍ഡ് നടപടി സ്വീകരിക്കുക.
അതേസമയം കുറ്റക്കാര്‍ക്കെതിരേ ഒരു വര്‍ഷത്തെ വിലക്കേര്‍പ്പെടുത്തിയേക്കുമെന്ന് സൂചനയുണ്ട്. കുറ്റക്കാരെന്ന് കണ്ടെത്തിയാല്‍ ആജീവനാന്ത വിലക്കേര്‍പ്പെടുത്തണമെന്ന മുറവിളി ആസ്‌ത്രേലിയയില്‍ നിന്ന് തന്നെ ഉയരുന്നുണ്ട്. രാജ്യത്തിന് തന്നെ അപമാനമായ സംഭവത്തിന് കാരണക്കാരെ ഒരിക്കലും ഇനി രാജ്യത്തിന്റെ കുപ്പായം അണിയിക്കരുതെന്നുമാണ് രാജ്യത്തിന്റെ പല കോണില്‍ നിന്നും ഉയരുന്ന ആവശ്യങ്ങള്‍. മുന്‍ ക്രിക്കറ്റ് താരങ്ങളില്‍ പലരും ആജീവനാന്ത വിലക്കിനെ എതിര്‍ക്കുന്നവരാണ്.