ന്യൂഡല്‍ഹി: രാഷ്ട്രപിതാവ് മഹാത്മാഗാന്ധിജിയെ കൊലപ്പെടുത്തിയ കേസ് പുനരന്വേഷിക്കണമെന്ന ആവശ്യം സുപ്രിംകോടതി തള്ളി. സംഘപരിവാര്‍ പ്രവര്‍ത്തകന്‍ നാഥൂറാം ഗോഡ്‌സെയാണ് ഗാന്ധിയെ വെടിവച്ചുകൊന്നതെന്ന അമിക്കസ്‌ക്യൂറിയുടെ റിപ്പോര്‍ട്ട് അംഗീകരിച്ച് ജസ്റ്റിസുമാരായ എസ്.എ ബോബ്ഡ, എല്‍. നാഗേശ്വര റാവു എന്നിവരടങ്ങിയ രണ്ടംഗബെഞ്ചാണ് ഹരജി തള്ളിയത്. നിങ്ങള്‍ (ഹരജിക്കാര്‍) പറയുന്നു യഥാര്‍ത്ഥത്തില്‍ എന്താണു സംഭവിച്ചതെന്ന് അറിയാന്‍ ജനങ്ങള്‍ക്ക് അവകാശം ഉണ്ടെന്ന്. എന്നാല്‍, ഇതിനകം യഥാര്‍ത്ഥ്യം എന്താണെന്ന് ജനങ്ങള്‍ അറിഞ്ഞുകഴിഞ്ഞു. ഇപ്പോള്‍ നിങ്ങള്‍ ചെയ്യുന്നത് ജനങ്ങളുടെ മനസ്സില്‍ സംശയങ്ങള്‍ നിറക്കുകയാണ്. ഗാന്ധിയെ കൊലപ്പെടുത്തിയത് ആരാണെന്നു വ്യക്തമായതാണ്. അവരെതൂക്കിലേറ്റുകയുംചെയ്‌തെന്നും രണ്ടംഗബെഞ്ച് വ്യക്തമാക്കി. പിന്നാലെ ഹരജി തള്ളുകയാണെന്നും കോടതി പ്രഖ്യാപിച്ചു.
ആര്‍.എസ്.എസ് പ്രവര്‍ത്തകന്‍ ഗോഡ്‌സെ അല്ല ഗാന്ധിജിയെ വെടിവച്ചുകൊന്നതെന്നും മറ്റൊരു അജ്ഞാതനാണ് കൃത്യംചെയ്തതെന്നും ചൂണ്ടിക്കാട്ടി തീവ്ര ഹിന്ദുത്വസംഘടനയായ അഭിനവ് ഭാരത് നേതാവ് മുംബൈ സ്വദേശി പങ്കജ് ഫദ്‌നാവിസ് നല്‍കിയ ഹരജിയായിരുന്നു ഈ വിഷയത്തില്‍ കോടതിയിലുണ്ടായിരുന്നത്. കേസില്‍ നേരത്തെ കോടതി മുതിര്‍ന്ന അഭിഭാഷകനും മുന്‍ അഡീഷനല്‍ സോളിസിറ്റര്‍ ജനറലുമായ അമരീന്ദ്ര സരണിനെ അമികസ്‌ക്യൂറിയായി നിയമിക്കുകയും ചെയ്തിരുന്നു. കേസില്‍ പുതിയ തെളിവുകള്‍ ഒന്നും ലഭ്യമല്ലെന്നിരിക്കെ വീണ്ടും അന്വേഷണം നടത്തേണ്ട സാഹചര്യമില്ലെന്ന് വ്യക്തമാക്കി അമിക്കസ്‌ക്യൂറി റിപ്പോര്‍ട്ടും സമര്‍പ്പിച്ചു. ഈ റിപ്പോര്‍ട്ട് പരിഗണിച്ചാണ് സുപ്രിംകോടതി ഹരജിക്കാരന്റെ ആവശ്യം തള്ളിയത്. ഗോഡ്‌സെയുടേതല്ലാതെ മറ്റൊരാളുടെ വെടിയേറ്റാണ് ഗാന്ധി മരിച്ചതെന്നതിന് തെളിവില്ലെന്നും വിദേശഏജന്‍സികള്‍ക്ക് ഗാന്ധിവധത്തില്‍ പങ്കുണ്ടെന്ന ആരോപണം അടിസ്ഥാനരഹിതമാണെന്നും റിപ്പോര്‍ട്ട് വ്യക്തമാക്കി.
1948 ജനുവരി 30നാണ് ഗാന്ധിജിയെ ഗോഡ്‌സെ വെടിവച്ചുകൊന്നത്. അടുത്തവര്‍ഷം നവംബര്‍ 15ന് ഗോഡ്‌സെയെയും കൂട്ടുപ്രതി നാരായണ്‍ ആപ്‌തെയെയും തൂക്കിലേറ്റി. സ്വതന്ത്ര ഇന്ത്യയില്‍ ആദ്യമായി തൂക്കിലേറ്റപ്പെട്ടതും ഇരുവരുമാണ്. ഗാന്ധിജിക്ക് മരണസമയം നാലുവെടിയേറ്റിരുന്നുവെന്നും ഗെഡ്‌സെ മൂന്നുവെടിയുണ്ടകള്‍ മാത്രമാണ് ഉതിര്‍ത്തതെന്നും എന്നാല്‍, നാലാമത്തെ വെടിയുണ്ടയാണ് ഗാന്ധിജിയുടെ ജീവനെടുത്തതെന്നുമാണ് പങ്കജ് ഹരജിയില്‍ വാദിച്ചത്. ഈ നാലാമത്തെ വെടിയുണ്ട ഉതിര്‍ത്തത് ആരാണെന്ന് അന്വേഷിക്കണമെന്നായിരുന്നു ഹരജിക്കാരന്റെ ആവശ്യം. കൊലപാതകം പുനരന്വേഷിക്കണമെന്നാവശ്യപ്പെടുന്ന ഹരജി കഴിഞ്ഞവര്‍ഷം ജൂണില്‍ ബോംബെ ഹൈക്കോടതി തള്ളിയിരുന്നു.
ഈ നടപടി ചോദ്യംചെയ്താണ് പങ്കജ് സുപ്രിംകോടതിയെ സമീപിച്ചത്. കേസ് ഈ മാസം ആറിനു വാദം പൂര്‍ത്തിയായി വിധി പറയാനായി മാറ്റിവയ്ക്കുകയായിരുന്നു. കേസ് നിയമത്തിന്റെ വഴിക്കു പോവാനാണ് ആഗ്രഹിക്കുന്നതെന്നും ഇതില്‍ രാഷ്ട്രീയതാല്‍പ്പര്യമില്ലെന്നും കോടതി തുടക്കംമുതല്‍ തന്നെ വ്യക്തമാക്കിയിരുന്നു.