കോഴിക്കോട്: 459ാം ഇടിയങ്ങര അപ്പവാണിഭ നേര്‍ച്ചയ്ക്ക് ശനിയാഴ്ച കൊടിയുയരും. 1559ല്‍ ഇഹലോകവാസം വെടിഞ്ഞ ശംസുദ്ദീന്‍ അബുല്‍ വഫാ ശൈഖ് മുഹമ്മദ് എന്നവരുടെ ആണ്ട് നേര്‍ച്ചയാണ് അപ്പവാണിഭ നേര്‍ച്ചയെന്ന പേരില്‍ അറിയപ്പെടുന്നത്.
31 ന് രാവിലെ ഒന്‍പതിന് സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്്‌രി മുത്തുക്കോയ തങ്ങള്‍ കൊടിയുയര്‍ത്തുന്നതോടെ ചരിത്രപ്രസിദ്ധമായ ആണ്ടുനേര്‍ച്ചക്ക് ഔദ്യോഗിക തുടക്കമാകും. തുടര്‍ന്ന് ചേലക്കാട് മുഹമ്മദ് മുസ്‌ലിയാര്‍ ഓത്തിടല്‍ കര്‍മം നിര്‍വഹിക്കും.
രാവിലെ 9.30 ന് പണ്ഡിത സംഗമം സമസ്ത കേരള ജംഇയ്യത്തുല്‍ ഉലമ ജന.സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ജന.സെക്രട്ടറി എം.ടി അബ്ദുല്ല മുസ്‌ലിയാര്‍ മുഖ്യപ്രഭാഷണം നടത്തും. നന്തി ജാമിഅ ദാറുസ്സലാം പ്രിന്‍സിപ്പല്‍ മൂസക്കുട്ടി ഹസ്രത്ത് അധ്യക്ഷനാകും. പ്രമുഖ പണ്ഡിതന്‍ അത്തിപ്പറ്റ മൊയ്തീന്‍ കുട്ടി മുസ്‌ലിയാര്‍ പ്രാര്‍ഥന നടത്തും. ഇ.കെ അബൂബക്കര്‍ മുസ്‌ലിയാര്‍, പി.പി ഉമര്‍ മുസ്‌ലിയാര്‍ കൊയ്യോട്, ഉമര്‍ ഫൈസി മുക്കം, ഹംസക്കുട്ടി മുസ്‌ലിയാര്‍ ആദൃശേരി, ആര്‍.വി കുട്ടിഹസന്‍ ദാരിമി, എം.സി മായിന്‍ ഹാജി, ചെമ്മുക്കന്‍ കുഞ്ഞാപ്പു ഹാജി തുടങ്ങിയവര്‍ സംബന്ധിക്കും.
ഞായറാഴ്ചയും തിങ്കളാഴ്ചയും സിയാറത്തും കൂട്ടപ്രാര്‍ഥനയും നടക്കും. ചൊവ്വാഴ്ച ഖത്തം ദുആ ചടങ്ങിന് മാണിയൂര്‍ അഹ്്മദ് മൗലവി നേതൃത്വം നല്‍കും. സമസ്ത ട്രഷറര്‍ സി.കെ.എം സ്വാദിഖ് മുസ്‌ലിയാര്‍ അധ്യക്ഷനാകും. ഉച്ചയ്ക്ക് ഒരുമണിയോടെ അന്നദാനം തുടങ്ങുമെന്നും നന്തി ജാമിഅ ദാറുസ്സലാം ജന.സെക്രട്ടറി എ.വി അബ്ദുറഹിമാന്‍ മുസ്‌ലിയാര്‍, ശൈഖ് പള്ളി ഇമാം എം. അബ്ദുല്‍ ഗഫാര്‍ ദാരിമി, മാനേജിങ് കമ്മിറ്റിയംഗം കെ. മരക്കാര്‍ ഹാജി കുറ്റിക്കാട്ടൂര്‍ എന്നിവര്‍ വാര്‍ത്താ സമ്മേളനത്തില്‍ അറിയിച്ചു.