കൊച്ചി: രണ്ടുമാസത്തെ വേനലവധിക്ക് സ്‌കൂളുകള്‍ പൂട്ടിയതോടെ വിദ്യാര്‍ഥികള്‍ക്ക് ഉത്സവകാലം. ഇന്നലെ എസ്.എസ്്.എല്‍.സി പരീക്ഷയ്ക്ക് വിരാമമായതോടെയാണ് അവധിക്കാലത്തിന് തുടക്കമായത്. ഇന്നലെ നടന്ന ഇംഗ്ലീഷ് പരീക്ഷ ഈസി ആയിരുന്നെന്നാണ് വിദ്യാര്‍ഥികള്‍ പറഞ്ഞത്. എല്ലാപരീക്ഷയും ഭേദപ്പെട്ട രീതിയില്‍ എഴുതിയെങ്കിലും കണക്കു പരീക്ഷ അല്‍പം പ്രയാസമായിരുന്നെന്ന അഭിപ്രായമാണ് മിക്ക വിദ്യാര്‍ഥികളും പ്രകടിപിച്ചത്.
ഒമ്പതാം ക്ലാസുവരെയുള്ള കുട്ടികളുടെ പരീക്ഷ കഴിഞ്ഞദിവസങ്ങളില്‍ അവസാനിച്ചിരുന്നു.അവധിക്കാലം കെങ്കേമമാക്കാമുള്ള തയാറെടുപ്പിലാണ് ഓരോരുത്തരും. വിവിധ ക്യാംപുകളിലേക്ക് നേരത്തെ തന്നെ അപേക്ഷ നല്‍കിയിട്ടുണ്ട് ഇവരിലേറെ പേരും. ഡിജിറ്റല്‍ സാങ്കേതിക വിദ്യയിലൂന്നിയ കളിചിരി പഠനത്തിന് കാത്തിരിക്കുകയാണ് ഇവര്‍.
മാതാപിതാക്കള്‍ക്കൊപ്പം വിനോദയാത്രയ്ക്ക് പോകാനും ബന്ധുവീടുകളില്‍ പോയി ആര്‍ത്തുല്ലസിച്ച് കളിക്കാനും മാളുകളൊക്കെ ചുറ്റിനടന്ന് കാണാനും വട്ടം കൂട്ടി കാത്തിരിക്കുന്നവരും ഇവര്‍ക്കിടയിലുണ്ട്. ഇനി പത്താംക്ലാസിലേക്ക് പ്രവേശിക്കുന്നവര്‍ക്കാകട്ടെ അവധികാലം പൂര്‍ണമായി അടിച്ചുപൊളിക്കാന്‍ സാധിക്കില്ലല്ലോ എന്ന സങ്കടമാണ്. കടുത്ത ചൂടുകാലം കൂടിയായ ഏപ്രില്‍,മെയ് മാസങ്ങളില്‍ ഒഴുവുകാലം ചുട്ടുപൊള്ളുമോ എന്ന ആശങ്കയും കുട്ടികള്‍ക്കുണ്ട്.