ചെറുതോണി: ജില്ലാ ആസ്ഥാനത്ത് പ്രവര്‍ത്തിക്കുന്ന കലക്ട്രേറ്റ് ഉള്‍പ്പെടെ സര്‍ക്കാര്‍ സ്ഥാപനങ്ങള്‍ പഞ്ചായത്തില്‍ അടയ്ക്കാനുള്ളത് ലക്ഷങ്ങള്‍. സ്വകാര്യ മൊബൈല്‍ ടവറുകള്‍ കഴിഞ്ഞ പത്ത് വര്‍ഷമായി നികുതി അടയ്ക്കുന്നില്ല.പഞ്ചായത്ത് സെക്രട്ടറിയുടെ നേതൃത്വത്തില്‍ സ്‌പെഷ്യല്‍ സ്‌ക്വാഡ് ജപ്തി നടപടികള്‍ ആരംഭിച്ചു. ഇടുക്കി കലക്ട്രേറ്റ്, സോഷ്യല്‍ ഫോറസ്റ്ററി ഓഫീസ്, വൈല്‍ഡ് ലൈഫ് ഓഫീസ്, പൊലിസ്,കെ.എസ്.ഇ.ബി.സബ് സ്‌റ്റേഷന്‍, ജില്ലാ വ്യവസായ കേന്ദ്രം, ബി.എസ.എന്‍.എല്‍ ഓഫീസ്, പൊതുമരാമത്ത് വകുപ്പ് ഓഫീസ് എന്നീ സര്‍ക്കാര്‍ സ്ഥാപനങ്ങള്‍ 39,45,517രൂപയും സ്വകാര്യ വൃക്തികള്‍ 12,90,453രൂപയും ആണ് പഞ്ചായത്തിന് അടയ്ക്കാനുള്ള നികുതി കുടിശിക.
കലക്ട്രേറ്റ് മാത്രം 129150 രൂപ, ബി.എസ്.എന്‍.എല്‍ 221310 രൂപ എന്നിവയാണ് ഏറ്റവും കൂടുതല്‍ കുടിശികയുള്ള സര്‍ക്കാര്‍ സ്ഥാപനങ്ങള്‍. പഞ്ചായത്തില്‍ സ്ഥാപിച്ചിരിക്കുന്ന ആറ് സ്വകാര്യ മൊബൈല്‍ ടവറുകളില്‍ ചിലത് കഴിഞ്ഞ പത്ത് വര്‍ഷമായി നികുതി അടയ്ക്കാതെ പ്രവര്‍ത്തിക്കുകയായിരുന്നു. ടവറുകളുടെ ജപ്തി നടപടികള്‍ ഇന്നലെ ആരംഭിച്ചപ്പോള്‍ 166002 രൂപ ഉച്ചയോടെ പഞ്ചായത്ത് ഓഫീസില്‍ അടച്ചു. പണം അടയ്ക്കാത്ത തടിയംമ്പാട് പ്രവര്‍ത്തിക്കുന്ന സ്വകാര്യ മൊബൈല്‍ ടവര്‍ പഞ്ചായത്ത് സെക്രട്ടറി പൂട്ടി സീല്‍ ചെയ്തു. 17056 രൂപയാണ് ഈ ടവറില്‍ കുടിശികയുള്ളത്.
ജപ്തി നടപടികള്‍ ആരംഭിച്ചതോടെ കഴിഞ്ഞ മൂന്ന് ദിവസമായി പഞ്ചായത്തില്‍ എത്തിയത് ഏകദേശം പത്ത്‌ലക്ഷം രൂപയാണ്. നികുതി അടയ്ക്കുവാന്‍ വിസമ്മതിച്ച 122 സ്വകാര്യവൃക്തികള്‍ക്കെതിരെ പഞ്ചായത്ത് നീയമനടപടികള്‍ ആരംഭിച്ചതായി സെക്രട്ടറി മധുസുദനന്‍ ഉണ്ണിത്താന്‍ പറഞ്ഞു.