റിയാദ്: സഊദിയില്‍ മൃതദേഹങ്ങളുടെ എംബാമിങ് നടപടികള്‍ക്കുള്ള തുകയില്‍ വന്‍ വര്‍ധനവ്. 1000 റിയാലാണ് എംബാമിങ് നിരക്കില്‍ വര്‍ധനവ് വരുത്തിയത്. ഇതോടെ മൃതദേഹം നാട്ടിലേക്കു കൊണ്ടുപോകാനുള്ള ചെലവ് കൂടും. ഇതുവരെ 5000 റിയാലായിരുന്നു എംബാമിങ് നടപടികള്‍ക്കുള്ള ചെലവ്.
പുതിയ നിരക്കോടെ ഒരു മൃതദേഹത്തിന് എംബാമിങ് ചെലവ് മാത്രം 6000 റിയാലായി ( 104273 രൂപ) ഉയര്‍ന്നു. വിമാനക്കമ്പനികള്‍ ഈടാക്കുന്ന നിരക്കുകൂടി പരിഗണിച്ചാല്‍ സഊദിയില്‍ നിന്ന് മൃതദേഹം നാട്ടിലെത്തിക്കാന്‍ വന്‍തുക നല്‍കേണ്ടി വരും. ഇന്‍ഷുറന്‍സ് പരിരക്ഷയുള്ളവര്‍ക്ക് ക്ലയിമിങ്ങിനു ശേഷം തുക ലഭിക്കുമെങ്കിലും ഇത് ഇല്ലാത്തവരുടെ മൃതദേഹം നാട്ടിലേക്ക് അയക്കാന്‍ ഇത്രയും തുക ബന്ധപ്പെട്ടവര്‍ കണ്ടെത്തണം.
രണ്ടു ദിവസം മുന്‍പാണ് സഊദിയില്‍ എംബാമിങ് ചാര്‍ജ് വര്‍ധിപ്പിച്ചത്. മരിച്ച വ്യക്തിയുമായി ബന്ധപ്പെട്ട നിയമക്കുരുക്കുള്‍ അഴിഞ്ഞശേഷം എംബാമിങ്ങിന് അധികൃതരില്‍ നിന്ന് അനുമതിപത്രം ലഭിക്കണം.
ഓണ്‍ലൈന്‍ വഴി പണമടച്ച് മോര്‍ച്ചറിയില്‍ നിന്ന് ലഭിക്കുന്ന അപേക്ഷ വിമാനത്താവളത്തില്‍ കൊണ്ടുപോയി സീല്‍ ചെയ്യിപ്പിച്ച് എത്തിച്ചതിനു ശേഷമാണ് ഫ്രീസറില്‍ നിന്ന് മൃതദേഹം പുറത്തെടുക്കുക. ഇവിടെ നിന്ന് എംബാമിങ്ങിനു ശേഷം വിമാനത്താവളത്തിലേക്ക് കൊണ്ടുപോകാം.
ആദ്യഘട്ടത്തില്‍ 2000 റിയാലായിരുന്ന എംബാമിങ് ചാര്‍ജ് തവണകളായി കഴിഞ്ഞ വര്‍ഷം ജനുവരിയിലാണ് 5000 റിയാലായി ഉയര്‍ത്തിയത്. എംബാമിങ് നിരക്കിനു പുറമെ മൃതദേഹം നാട്ടിലേക്ക് അയക്കാന്‍ വിമാനക്കമ്പനികള്‍ ഈടാക്കുന്ന തുകയായ കിലോക്ക് 16 റിയാല്‍ വീതം നല്‍കണം.
അയാട്ട നിയമ പ്രകാരമുള്ള ചാര്‍ജ് ആയതിനാല്‍ എല്ലാ വിമാനക്കമ്പനികളും ഇതേ നിരക്കാണ് ഈടാക്കുന്നത്. ചില രാജ്യങ്ങളിലേക്കും ഇന്ത്യയിലെ ഒറ്റപ്പെട്ട സ്ഥലങ്ങളിലേക്കും ചാര്‍ജില്‍ വ്യത്യാസമുണ്ടാകും. അതേസമയം പാകിസ്താന്‍ വിമാനം മാത്രമാണ് സൗജന്യമായി മൃതദേഹം നാട്ടിലേക്ക് കൊണ്ടുപോകുന്നത്. ഇതേ മാര്‍ഗം എയര്‍ ഇന്ത്യയും തുടരണമെന്ന ആവശ്യത്തിന് വര്‍ഷങ്ങളുടെ പഴക്കമുണ്ട്.