കൊല്‍ക്കത്ത: ഓരോ മത്സരം പിന്നിട്ടപ്പോഴും മികച്ച പ്രകടനം നടത്തിയാണ് സെമിയിലേക്കുള്ള കര്‍ണാടകയുടെ വരവ്. ബംഗാളിനെ നേരിടുന്നത് ബി ഗ്രൂപ്പ് ചാംപ്യന്‍മാരായി. ഏത് നിമിഷവും കളിക്കളത്തില്‍ അപകടം വിതയ്ക്കുന്ന മലയാളി താരങ്ങളാണ് കര്‍ണാടകയുടെ ശക്തി. കേരളത്തോട് തോല്‍വി വഴങ്ങിയ ബംഗാളിന്റെ പേടിയും കന്നടയുടെ ഈ മലയാളി താരങ്ങളണ്. എസ് രാജേഷും ലിയോണ്‍ അഗസ്റ്റനുമാണ് ആക്രമണം നയിക്കുന്നത്. ഏറെകാലത്തിന് ശേഷം സെമി ഫൈനലില്‍ ഇടം നേടിയ കര്‍ണാടക വിജയത്തില്‍ കുറഞ്ഞതൊന്നും ചിന്തിക്കുന്നില്ല. ആതിഥേയരായ ബംഗാളാവട്ടെ നാട്ടുകാര്‍ക്ക് മുന്നില്‍ വിജയിച്ച് കലാശപ്പോരിന് പന്തുതട്ടാനാവുമെന്ന വിശ്വാസത്തിലാണ്. മുന്നേറ്റനിരയിലെ താരം ബിദ്യാസാഗര്‍ സിങിലാണ് വംഗദേശത്തിന്റെ പ്രതീക്ഷ. നാല് ഗോളുകള്‍ അടിച്ച ബിദ്യാസാഗര്‍ ടോപ് സ്‌കോറര്‍ പട്ടികയില്‍ മുന്നിലുണ്ട്. പ്രതിരോധവും മധ്യനിരയും ആക്രമണനിരയും കൂടുതല്‍ ശക്തമാക്കി കര്‍ണാടകയെ നേരിടാനാണ് നിലവിലെ ജേതാക്കളായ ബംഗാള്‍ ഒരുങ്ങി നില്‍ക്കുന്നത്.