തലശ്ശേരി: ട്രെയിനിടിച്ചുണ്ടായ അപകടത്തെ തുടര്‍ന്ന് എടക്കാടിനും വടകരക്കും ഇടയില്‍ അഞ്ച് ട്രെയിനുകളുടെ യാത്ര തടസപ്പെട്ടു. ഇന്നലെ 5.30ന് കുയ്യാലി റെയില്‍വേ ഗേറ്റില്‍ യുവതിക്ക് മംഗളൂരു-തിരുവനന്തപുരം എക്‌സ്പ്രസ് ഇടിച്ച് പരുക്കേറ്റിരുന്നു.
ഇതേത്തുടര്‍ന്ന് ഈ വണ്ടിക്ക് പിറകേ വന്ന കൊച്ചുവേളി എക്‌സ്പ്രസ് എടക്കാട് സ്റ്റേഷനില്‍ 10 മിനുട്ട് നിര്‍ത്തിയിട്ട ശേഷമാണ് യാത്ര തുടര്‍ന്നത്.
ഗുരുതരമായി പരുക്കേറ്റ യുവതിയെ തലശ്ശേരി ജനറല്‍ ആശുപത്രിയില്‍ പ്രവേശിപ്പിച്ചു. ഏഴ് മണിയോടെ തലശ്ശേരി മൂന്നാം ഗേറ്റിനടുത്ത് ട്രെയിനിടിച്ച് അജ്ഞാതന്‍ മരിച്ചതിനെത്തുടര്‍ന്ന് മംഗളൂരുവിലേക്കുള്ള എഗ്മൂര്‍ എക്‌സ്പ്രസ് മാഹി സ്റ്റേഷനില്‍ നിര്‍ത്തിയിട്ടു. ആറരയോടെയെത്തിയ എഗ്മൂറിന്റെ യാത്ര ഒരു മണിക്കൂറോളം തടസപ്പെട്ടു. 7.10ന് മാഹി സ്റ്റേഷനിലെത്തിയ പരശുറാം എക്‌സ്പ്രസിന്റെ യാത്രയും ഒരു മണിക്കൂറോളം തടസപ്പെട്ടു. ഇതേത്തുടര്‍ന്ന് മംഗള, നേത്രാവതി എക്‌സ്പ്രസുകളുടെ യാത്രയും തലശ്ശേരിയില്‍ അല്‍പനേരം തടസപ്പെട്ടു.