ജിദ്ദ: ചോദ്യപേപ്പര്‍ ചോര്‍ന്നതിനെത്തുടര്‍ന്ന് ആശങ്കയിലായ സി.ബി.എസ്.ഇ ഗള്‍ഫ് വിദ്യാര്‍ഥികള്‍ക്ക് ആശ്വാസവാര്‍ത്ത. മാറ്റിവച്ച പ്ലസ് ടു ഇക്കണോമിക്‌സ് പരീക്ഷ രാജ്യത്തിന് പുറത്തു നടത്തില്ലെന്നു വിദ്യാഭ്യാസ സെക്രട്ടറി അനില്‍ സ്വരൂപ് അറിയിച്ചു. രാജ്യത്തിനു വെളിയില്‍ ഒരു പരീക്ഷയുടേയും ചോദ്യപ്പേപ്പര്‍ ചോര്‍ന്നിട്ടില്ലെന്നും അതുകൊണ്ടു തന്നെ വീണ്ടും പരീക്ഷ നടത്തേണ്ട കാര്യമില്ലെന്നും അദ്ദേഹം പറഞ്ഞു. ഇന്ത്യക്കു പുറത്ത് സി.ബി.എസ്.ഇ പരീക്ഷക്ക് നല്‍കിയ ചോദ്യപേപ്പറുകള്‍ വ്യത്യസ്തമാണെന്നും അദ്ദേഹം പറഞ്ഞു.

പ്ലസ് ടു ഇക്കണോമിക്‌സ് പരീക്ഷ ഏപ്രില്‍ 25ന് വീണ്ടും നടത്തും. ഹരിയാനയിലും ഡല്‍ഹിയിലും മാത്രം ചോര്‍ന്ന പത്താം ക്ലാസ് കണക്ക് പരീക്ഷ എപ്പോള്‍ നടത്തുമെന്ന് പ്രഖ്യാപിച്ചിട്ടില്ല.

സി.ബി.എസ്.ഇയുടെ നടപടി ഗള്‍ഫ് മേഖലയിലെ ലക്ഷകണക്കിന് വിദ്യാര്‍ഥികള്‍ക്കും രക്ഷിതാകള്‍ക്കും ഏറെ ആഹ്ലാദം നല്‍കുന്നതാണ്. പുന: പരീക്ഷയില്‍ നിന്നു ഗള്‍ഫ് സ്‌കൂളുകളെ ഒഴിവാക്കണമെന്ന ആവശ്യം ശക്തമായിരുന്നു. ഈ ആവശ്യം ഉന്നയിച്ച് ദമ്മാം ഇന്ത്യന്‍ സ്‌കൂള്‍ സി.ബി.എസ്.ഇക്ക് കത്തയക്കുകയും ചെയ്തിരുന്നു.

പലരും പരീക്ഷ കഴിയുന്ന തിയതി കണക്കാക്കി നാട്ടില്‍ പോവാനുള്ള ടിക്കറ്റുകള്‍ എടുത്തവരായിരുന്നു. ഇവരില്‍ ചിലര്‍ ഫൈനല്‍ എക്‌സിറ്റില്‍ നാട്ടില്‍ പോകുന്നവരായതിനാല്‍ ഇനി ടിക്കറ്റ് മാറ്റിയെടുക്കുവാനോ നീട്ടുവാനോ സാധിക്കില്ല. ഇതിനിടയില്‍ ചിലര്‍ നാട്ടിലേക്ക് തിരിച്ചവരും ഉണ്ടായിരുന്നു. ഇവര്‍ക്കെല്ലാം സി.ബി.എസ്.ഇയുടെ തീരുമാനം ആശ്വാസകരമായി.