വിജിത്ത് താടിക്കാരന്‍

നെടുമങ്ങാട്: ബസുകളുടെ അഭാവംമൂലം നെടുമങ്ങാട് കെ.എസ്.ആര്‍.ടി.സി ഡിപ്പോയുടെ പ്രവര്‍ത്തനം അവതാളത്തില്‍. മേലുദ്യോഗസ്ഥരുടെ കടുത്ത അവഗണനയാണ് ഈ ദുരവസ്ഥക്കുകാരണമെന്നാണ് നാട്ടുകാരുടെ ആക്ഷേപം.
ബസുകളുടെ കുറവുമൂലം കടുത്ത യാത്രാ ക്ലേശമാണ് ജനങ്ങള്‍ അനുഭവിക്കുന്നത്. അറുപത്തിയെട്ട് ഷെഡ്യൂളുകളും അതിന് അനുയോജ്യമായ ബസുകളും ഉണ്ടായിരുന്ന ഈ ഡിപ്പോയിലിപ്പോള്‍ അമ്പത്തേഴ് ഷെഡ്യൂളുകള്‍ മാത്രമാണുള്ളത്.
അതിനുപോലും കൃത്യമായി സര്‍വിസു നടത്താന്‍ ബസുകളില്ല. ഉള്ള ബസുകളില്‍ അധികവും സഞ്ചാരയോഗ്യമായവയുമല്ല. ഏതു നിമിഷവും വഴിയിലാകുമെന്ന ആശങ്കയുമായാണ് ബസുകള്‍ സര്‍വിസ് നടത്തുന്നത്. അശോക് ലൈലാന്റിന്റെ കേടുപാടില്ലാത്ത വാഹനങ്ങളായിരുന്നു പൂര്‍ണമായും ഡിപ്പോയിലുണ്ടായിരുന്നത്. ഇതില്‍ നല്ല കണ്ടീഷനിലുള്ള വാഹനങ്ങളില്‍ അധികവും മേലധികാരികള്‍ തങ്ങള്‍ക്കുവേണ്ടപ്പെട്ട മറ്റു ഡിപ്പോകളിലേക്കു കൊണ്ടുപോയി.
പകരം മറ്റു ഡിപ്പോകളില്‍ ഓടാതെ കിടക്കുന്ന വാഹനങ്ങളെ ഇവിടെ കൊണ്ടുവന്ന് എണ്ണം തികയ്ക്കുന്ന സമീപനമാണ് അധികാരികള്‍ കൈക്കൊള്ളുന്നതെന്നാണ് പരാതി. ഇത് ഡിപ്പോയുടെ സുഖമമായ നടത്തിപ്പിനേയും യാത്രക്കാരുടെ യാത്രാ സൗകര്യത്തെയും ബാധിച്ചിരിക്കുകയാണ്.
നല്ല കളക്ഷനുള്ള പല സര്‍വിസുകളും മുടങ്ങിക്കിടക്കുകയാണ്. മലയോര മേഖലയിലേക്കുള്ള കലക്ഷന്‍ കുറവായ സര്‍വിസുകള്‍ പലതും മുടങ്ങുമെന്ന ഭീഷണിയിലാണ്. സമാന്തര വാഹന സൗകര്യങ്ങള്‍ ഈ മേഖലകളിലേക്ക് ഇല്ലാത്തതിനാല്‍ കടുത്ത പ്രതിഷേധം ഭയന്ന് നല്ല കളക്ഷന്‍ ട്രിപ്പുകളെ മുടക്കി മലയോര സര്‍വിസുകള്‍ നിലനിര്‍ത്തി പോരുകയാണിപ്പോള്‍.
കേടായ ബസുകളില്‍ ചിലതുകൂടി കട്ടപ്പുറത്തായാല്‍ മലയോര സര്‍വിസുകളും നിലക്കും.
ദിനംപ്രതി ആയിരക്കണക്കിന് യാത്രക്കാരാണ് ഡിപ്പോയില്‍ വന്നു പോകുന്നത്. മാനദണ്ഡങ്ങള്‍ പാലിക്കാതെ ജീവനക്കാരെ കൂട്ടത്തോടെ സ്ഥലം മാറ്റുന്നതും ഡിപ്പോയുടെ പ്രവര്‍ത്തനത്തെ ബാധിക്കുന്നുണ്ട്.
ഇവിടെ ജോലി ചെയ്തിരുന്ന ഭൂരിഭാഗം ജീവനക്കാരെയും പാലക്കാട് മേഖലയിലേക്ക് സ്ഥലം മാറ്റിയിരിക്കുകയാണ്. ഇക്കാരണത്താല്‍ ഏറെ ബുദ്ധിമുട്ടാണ് ജീവനക്കാര്‍ സഹിക്കുന്നതെന്നും ആക്ഷേപമുണ്ട്.