റിയാദ്: സഊദി ലക്ഷ്യമാക്കി യമനിലെ ഹൂതികള്‍ തൊടുത്തുവിട്ട മിസൈല്‍ സഊദി റോയല്‍ വ്യോമ പ്രതിരോധ സേന ആകാശത്തുവച്ച് തകര്‍ത്തു. വ്യാഴാഴ്ച രാത്രി 9.35ഓടെയാണ് സംഭവം.
അതിര്‍ത്തിപ്രദേശമായ ജിസാനിലെ ജനവാസ കേന്ദ്രം ലക്ഷ്യമാക്കി തൊടുത്തുവിട്ട മിസൈല്‍ ആകാശത്തുവച്ച് തകര്‍ത്തതിനാല്‍ വന്‍ദുരന്തം ഒഴിവായി. ഞായറാഴ്ച അര്‍ദ്ധരാത്രിയും ഇറാന്‍ അനുകൂല ഹൂതികള്‍ സഊദിക്കുനേരെ മിസൈല്‍ ആക്രമണം നടത്തിയിരുന്നു.
ഇന്നലെ മിസൈല്‍ വിക്ഷേപിച്ചത് യമന്‍ അതിര്‍ത്തിയിലെ ഹൂതികളുടെ ശക്തികേന്ദ്രമായ സഅദ ഗവര്‍ണറേറ്റില്‍ നിന്നാണെന്നും ജിസാനിലെ ജനവാസമേഖല ലക്ഷ്യമാക്കിയാണ് വന്നതെന്നും സഖ്യസേന വക്താവ് കേണല്‍ തുര്‍ക്കി അല്‍മാലികി വ്യക്തമാക്കിയതായി സഊദി വാര്‍ത്താ ഏജന്‍സി റിപ്പോര്‍ട്ട് ചെയ്തു.
ഇറാന്‍ ആയുധങ്ങളാണ് ഹൂതികള്‍ ഉപയോഗിക്കുന്നതെന്ന് തെളിഞ്ഞതായും അദ്ദേഹം പറഞ്ഞു. അതേസമയം, ഹൂതികളുടെ തുടര്‍ച്ചയായുള്ള പ്രകോപനം മേഖലയെ കൂടുതല്‍ അരക്ഷിതാവസ്ഥയില്‍ എത്തിക്കുമെന്ന ആശങ്കയുയര്‍ന്നു. സഊദി തലസ്ഥാന നഗരിയടക്കം ലക്ഷ്യമാക്കി ഞായറാഴ്ച നടന്ന മിസൈല്‍ ആക്രമണത്തെ ലോകരാജ്യങ്ങളും ഐക്യരാഷ്ട്രസഭ രക്ഷാ സമിതിയും അപലപിച്ചിരുന്നു. 2015 ജൂണ്‍ ആറുമുതല്‍ ഇതുവരെ 104 ബാലിസ്റ്റിക് മിസൈലുകള്‍ സഊദിക്കുനേരെ ഹൂതികള്‍ പ്രയോഗിച്ചതായാണ് കണക്കുകള്‍. എന്നാല്‍, മിസൈലുകളെല്ലാം ആകാശത്തുവച്ച് തകര്‍ക്കുകയായിരുന്നു.