മലപ്പുറം: സാമ്പത്തിക വര്‍ഷം അവസാനിക്കാന്‍ ഒരു ദിവസം മാത്രം ബാക്കിനില്‍ക്കേ തദ്ദേശ സ്ഥാപനങ്ങളുടെ പദ്ധതി നിര്‍വഹണത്തില്‍ ജില്ല അഞ്ചാം സ്ഥാനത്ത്. ജില്ലയിലെ തദ്ദേശ സ്ഥാപനങ്ങള്‍ വകയിരുത്തിയ 581.6 കോടിയില്‍ 487.43 കോടി രൂപയും ചെലവഴിച്ചു. ഇന്നലെ വൈകിട്ടുവരെയുള്ള കണക്കു പ്രകാരം 83.81 ശതമാനം തുകയാണ് ജില്ല ചെലവിട്ടിട്ടുള്ളത്.
88.21 ശതമാനം ചെലവഴിച്ച എറണാകുളം ജില്ലയാണ് സംസ്ഥാനത്ത് ഒന്നാം സ്ഥാനത്ത്. 97.01 ശതമാനം തുക ചെലവഴിച്ചു താനൂര്‍ നഗരസഭയാണ് ജില്ലയില്‍ ഒന്നാമത്. 57.85 ശതമാനത്തിലെത്തിയ തിരൂരങ്ങാടിയാണ് ഏറ്റവും പിറകിലുള്ളത്. മഞ്ചേരി (91.47), പെരിന്തല്‍മണ്ണ (90.19), കൊണ്ടോട്ടി (88.440), മലപ്പുറം (73.17), പരപ്പനങ്ങാടി (65.99), പൊന്നാനി (65.93) എന്നിങ്ങനെയാണ് മറ്റു നഗരസഭകള്‍ ചെലവഴിച്ചത്.
ജില്ലാപഞ്ചായത്തുകളില്‍ ഒരാഴ്ച മുന്‍പുവരെ ഏറ്റവും പിറകിലായിരുന്ന മലപ്പുറം നിലവില്‍ ഏഴാം സ്ഥാനത്താണ്. 70.61 ശതമാനം ചെലവഴിച്ചാണ് മലപ്പുറം ജില്ലാപഞ്ചായത്ത് ഇപ്പോള്‍ ഏഴാമതെത്തിയിരിക്കുന്നത്. 84.09 ശതമാനം ചെലഴിച്ച് എറണാകുളം ജില്ലാപഞ്ചായത്ത് ഒന്നാം സ്ഥാനത്തും 68.92 ശതമാനത്തിലെത്തിയ കാസര്‍കോട് ഏറ്റവും പിറകിലുമാണ്. ബ്ലോക്ക് പഞ്ചായത്തുകളില്‍ നൂറു ശതമാനം തുകയും ചെലവഴിച്ച് പെരുമ്പടപ്പ് ബ്ലോക്ക് പഞ്ചായത്താണ് മുന്നിലുള്ളത്. 57.60 ശതമാനം ചെലവഴിച്ച് വണ്ടൂര്‍ ബ്ലോക്ക് സംസ്ഥാനത്തുതന്നെ ഏറ്റവും പിറകിലാണ്. ഗ്രാമപഞ്ചായത്തുകളില്‍ മുതുവല്ലൂരാണ് മുന്നില്‍. പിറകില്‍ വള്ളിക്കുന്ന് പഞ്ചായത്താണ്.
ട്രഷറി നിയന്ത്രണവും ചരക്കുസേവന നികുതിയുമായി ബന്ധപ്പെട്ട ആശയക്കുഴപ്പങ്ങളും കാരണം തദ്ദേശ സ്ഥാപനങ്ങളുടെ പദ്ധതി നിര്‍വഹണത്തില്‍ കാലതാമസം നേരിട്ടെങ്കിലും കഴിഞ്ഞ വര്‍ഷത്തെ അപേക്ഷിച്ച് ജില്ലയുടെ പദ്ധതി നിര്‍വഹണം വേഗത്തിലായിട്ടുണ്ട്. തെരഞ്ഞെടുപ്പ് പെരുമാറ്റച്ചട്ടമുണ്ടായിരുന്നതിനാല്‍ കഴിഞ്ഞ വര്‍ഷം ഏറെ പിറകിലായിരുന്നു. ഏറ്റവും കൂടുതല്‍ പണം ചെലവഴിക്കേണ്ട നവംബര്‍, ഡിസംബര്‍ മാസങ്ങള്‍ വേണ്ടത്ര ചെലവഴിക്കാനായില്ലെന്നാണ് വിലയിരുത്തല്‍.
മാര്‍ച്ച് മാസത്തില്‍ 15 ശതമാനം മാത്രമേ ചിലവഴിക്കാനാകൂ എന്ന സര്‍ക്കാര്‍ നിര്‍ദേശവും തദ്ദേശ സ്ഥാപനങ്ങളെ കുഴക്കി. ബജറ്റ് നടപടിക്രമങ്ങളും വാര്‍ഷിക പദ്ധതിക്ക് അംഗീകാരം നല്‍കുന്നതും പൂര്‍ത്തിയാക്കി ഏപ്രില്‍ ഒന്നാം തിയതി മുതല്‍ അടുത്ത വര്‍ഷത്തേക്കുള്ള പദ്ധതി നിര്‍വഹണം ആരംഭിക്കാനിരിക്കുകയാണ് ജില്ലയിലെ തദ്ദേശ സ്ഥാപനങ്ങള്‍..