തന്ത്രങ്ങള്‍ മാറ്റിയായിരുന്നു രണ്ടാം പകുതിയിലെ കേരളത്തിന്റെ തുടക്കം. അടിക്ക് അടി. ചവിട്ടിന് ചവിട്ട്. തല്ലുണ്ടാക്കാന്‍ തങ്ങളും പിന്നോട്ടില്ലെന്ന ഭാവം. ഇതോടെ മിസോറം താരങ്ങള്‍ വിരണ്ടു. കേരളത്തിന്റെ കൈക്കരുത്ത് നന്നായി അറിഞ്ഞത് ഗോളടി വീരന്‍ ലാല്‍റെമാവിയോയിരുന്നു. ചവിട്ടും കുത്തുമേറ്റ് താരം മത്സരത്തിലുടനീളം മങ്ങി പോയി.
48ാം ലാല്‍റെമാവിയയെ ഫൗള്‍ ചെയ്തതിന് എം.എസ് ജിതിന് റഫറിയുടെ വക മഞ്ഞ കാര്‍ഡ്. 49ാം മിനുട്ടില്‍ മിസോറം ഗോള്‍ മുഖത്തേക്ക് അഫ്ദലിന്റെ മുന്നേറ്റം. വലത് വിങിലൂടെ പന്തുമായി മുന്നേറിയ അഫ്ദല്‍ ഗോളി മാത്രം മുന്നില്‍ നില്‍ക്കേ നിറയൊഴിച്ചെങ്കിലും പന്ത് ലക്ഷ്യത്തിലേക്ക് എത്തിയില്ല.
മിഡ്ഫീല്‍ഡ് ജനറല്‍ എസ് സീസണിന്റെ നേതൃത്വത്തില്‍ മധ്യനിര ലോങ് ബോളുമായി മുന്നേറ്റത്തെ സഹായിക്കാന്‍ ശ്രമിച്ചെങ്കിലും പലപ്പോഴും ആളില്ലാത്ത അവസ്ഥയായി. കേരളം കൂടുതല്‍ പ്രതിരോധത്തിലേക്ക് വലിഞ്ഞു. നിരന്തരം മിസോറം കേരളത്തിന്റെ ഗോള്‍മുഖത്ത് വട്ടമിട്ടു പറന്നു. ഈ പറക്കലിനിടെയായിരുന്നു മിസോറമിന് തോല്‍വി സമ്മാനിച്ച ഗോള്‍ അഫ്ദല്‍ നേടിയത്.