ഗൂഡല്ലൂര്‍: വൈദികനെ തട്ടികൊണ്ടുപോയി പണം തട്ടാന്‍ ശ്രമിച്ച കേസില്‍ ഒളിവില്‍ കഴിയുന്ന പ്രതികള്‍ക്കായി പൊലിസ് തിരച്ചില്‍ ഊര്‍ജിതമാക്കി.
എറണാകുളം സ്വദേശി പത്തനാപുരം കൂടല്‍ ചര്‍ച്ചിലെ പള്ളി വികാരി ജോസഫ് ജോര്‍ജിനെയാണ് ഗൂഡല്ലൂരില്‍ നി്ന്ന് ഒരു സംഘം തട്ടികൊണ്ടുപോയിരുന്നത്. തുറപ്പള്ളിയിലെ ലോഡ്ജില്‍ നിന്നാണ് പൊലിസ് എന്ന വ്യാജേന ഇയാളെ തട്ടികൊണ്ടുപോയി പണം തട്ടാന്‍ ശ്രമിച്ചത്. പത്ത് ലക്ഷം രൂപ നല്‍കിയാലെ വിട്ടയക്കൂവെന്ന് സഹോദരന്മാരെ ഫോണില്‍ വിളിച്ച് ഭീഷണിപ്പെടുത്തുകയായിരുന്നു. തുടര്‍ന്ന് സഹോദരങ്ങള്‍ പൊലിസിലറിയിക്കുകയും സംഘത്തിന്റെ നീക്കം പൊലിസ് തടയുകയുമായിരുന്നു.
വേഷം മാറിയെത്തിയ പൊലിസ് സംഘം പ്രതികളെ വലയിലാക്കുകയായിരുന്നു. പതിനൊന്ന് പേരെയാണ് അന്ന് അറസ്റ്റ് ചെയ്തിരുന്നത്.
സംഭവത്തില്‍ ഇനിയും ചിലരുണ്ടെന്നാണ് പൊലിസിന് ലഭിച്ച സൂചന. ഇവര്‍ കേരളത്തില്‍ ഒളിവിലാണെന്നാണ് വിവരം. ശേഷിക്കുന്നവരെ പിടികൂടാന്‍ പൊലിസ് സ്‌പെഷ്യല്‍ സ്‌ക്വാഡിനെ നിയോഗിച്ചിട്ടുണ്ട്.