ബോവിക്കാനം: പ്ലാന്റേഷന്‍ കോര്‍പറേഷന്റെ കശുമാവിന്‍ തോട്ടത്തില്‍ തീപ്പിടിത്തം. മുതലപ്പാറ ജലസംഭരണിക്കു സമീപം റോഡരികിലെ തോട്ടത്തിലെ കശുമാവുകള്‍ നിറഞ്ഞ ഒരേക്കറോളം തോട്ടം കത്തിയമര്‍ന്നു.
ഇന്നലെ ഉച്ചയ്ക്കു രണ്ടോടെയാണ് സംഭവം. നാട്ടുകാരും പ്ലാന്റേഷന്‍ ജീവനക്കാരും കാസര്‍കോട്ട് നിന്നുമെത്തിയ അഗ്നിശമന സേനയും ചേര്‍ന്നു നടത്തിയ പരിശ്രമത്തിനൊടുവിലാണ് തീയണച്ചത്.
വേനല്‍ കനത്തു പുല്ലും കരിയിലകളും ഉണങ്ങിയതോടെ തീപ്പിടിത്തങ്ങളും വ്യാപകമായിരിക്കുകയാണ്. രണ്ടു മാസത്തിനിടെ പ്ലാന്റേഷന്റെയും വനംവകുപ്പിന്റെയും സ്വകാര്യ വ്യക്തികളുടെയും പറമ്പില്‍ നിരവധി തീപ്പിടിത്തങ്ങളാണുണ്ടായത്.
കരുതലില്ലായ്മയും സാമൂഹിക വിരുദ്ധരുടെ ചെയ്തികളുമാണ് തീപ്പിടിത്തങ്ങള്‍ വര്‍ധിക്കാന്‍ കാരണമെന്ന് നാട്ടുകാര്‍ ആരോപിച്ചു.