മുംബൈ: അണ്ടര്‍ 23 വനിതാ ടി20 ദേശീയ ക്രിക്കറ്റില്‍ കേരളത്തിന് ജയം. സൂപ്പര്‍ ലീഗ് പോരാട്ടത്തില്‍ കേരളം മധ്യപ്രദേശിനെ ഒറ്റ വിക്കറ്റിന് കീഴടക്കി വിജയം സ്വന്തമാക്കുകയായിരുന്നു. ആദ്യം ബാറ്റ് ചെയ്ത മധ്യപ്രദേശ് നിശ്ചിത 20 ഓവറില്‍ ആറ് വിക്കറ്റ് നഷ്ടത്തില്‍ 76 റണ്‍സെടുത്തു. കേരളം 18.4 ഓവറില്‍ ഒന്‍പത് വിക്കറ്റ് നഷ്ടത്തില്‍ 77 റണ്‍സെടുത്താണ് വിജയിച്ചത്.
അനായാസ വിജയത്തിലേക്ക് ബാറ്റേന്തിയ കേരളത്തിന് തുടക്കത്തില്‍ തന്നെ നാല് വിക്കറ്റുകള്‍ നഷ്ടമായി. അഞ്ചാം നമ്പറിലും ആറാം നമ്പറിലുമായി ബാറ്റിങിനിറങ്ങിയ മിന്നു മണി (38), അക്ഷയ എ (21) എന്നിവരുടെ അവസരോചിത ചെറുത്ത് നില്‍പ്പാണ് കേരളത്തെ മത്സരത്തിലേക്ക് മടക്കിയെത്തിച്ചത്. ഇരുവരും പുറത്തായ ശേഷവും കേരളത്തിനെ തുടരെ വിക്കറ്റുകള്‍ നഷ്ടമായെങ്കിലും അന്തിമ വിജയം കൈവിട്ടില്ല.
ആദ്യം ബാറ്റ് ചെയ്ത മധ്യപ്രദേശിനെ മികച്ച ബൗളിങിലൂടെ റണ്‍സടിക്കാന്‍ അനുവദിക്കാതെ കേരള ബൗളര്‍മാര്‍ വരിഞ്ഞിട്ടു. മൂന്ന് വിക്കറ്റുകള്‍ വീഴ്ത്തി ക്യാപ്റ്റന്‍ സജന എസ് തിളങ്ങി. 24 റണ്‍സെടുത്ത അന്‍ഷുല റാവുവാണ് മധ്യപ്രദേശ് നിരയിലെ ടോപ് സ്‌കോറര്‍.