ആര്‍പ്പൂക്കര : സ്വകാര്യ ബസിടിച്ച് റോഡില്‍ കിടന്ന ഇതര സംസ്ഥാന തൊഴിലാളിയെ പൊലിസ് ആശുപത്രിയിലെത്തിച്ചു. അസം സ്വദേശിയും കുമാരനല്ലൂരിലെ താമസക്കാരനുമായ നൂര്‍ മുഹമ്മദിനെയാണ് ഏറ്റുമാനൂര്‍ പൊലിസ് മെഡിക്കല്‍ കോളജ് ആശുപത്രിയിലെത്തിച്ചത്. ഇന്നലെ രാവിലെ 10.30ന് കുമാരനല്ലൂര്‍ കവലയിലായിരുന്നു അപകടം. റോഡ് മുറിച്ച് കടക്കുന്നതിനിടെ സ്വകാര്യ ബസിടിക്കുകയായിരുന്നു. ഇടിയെ തുടര്‍ന്ന് റോഡില്‍ വീണ യുവാവിനെ ആരും ആശുപത്രിയിലെത്തിക്കാന്‍ ശ്രമിച്ചില്ല. ഈ സമയം കോട്ടയത്തുനിന്ന് ഏറ്റുമാന്നുരിലേക്ക് വരുകയായിരുന്ന ഏറ്റുമാനൂര്‍ പൊലിസ് സ്റ്റേഷനിലെ, സീനിയര്‍, സി.പി.ഒ. കെ. ഉദയന്‍, സി.പി.ഒ.സന്തോഷ് എന്നിവരുടെ നേതൃത്വത്തിലാണ് നൂറിനെ ആശുപത്രിയിലെത്തിച്ചത്. റോഡില്‍ വീണ് രക്തം വാര്‍ന്ന യുവാവിനെ ആശുപത്രിയിലെത്തിക്കാത്തതില്‍ വ്യാപക പ്രതിഷേധമുയര്‍ന്നിട്ടുണ്ട്.