ചാരുംമൂട്: കരിമുളക്കല്‍ സെന്റ് ഗ്രിഗോറിയോസ് ഓര്‍ത്തഡോക്‌സ് ദേവാലയത്തിനു നേരെ ആര്‍.എസ്.എസ് ആക്രമണം. ഈസ്റ്റര്‍ രാത്രി കുര്‍ബാനക്ക് വന്ന ഇടവക വികാരിക്കു നേരെയും ഭക്ത ജനങ്ങള്‍ക്ക് നേരെയും ആക്രമണം ഉണ്ടായി. പള്ളി ഓഫിസ് അടിച്ചു തകര്‍ക്കുകയും ചെയ്തു. അക്രമവുമായി ബന്ധപ്പെട്ട് മൂന്ന്‌പേരെ നൂറനാട് പൊലിസ് അറസ്റ്റ് ചെയ്തു. കരിമുളയ്ക്കല്‍, താമരക്കുളം സ്വദേശികളായ സുനു, സനില്‍കുമാര്‍, അരുണ്‍ കുമാര്‍ എന്നിവരെയാണ് അറസ്റ്റ് ചെയ്തത്.
പള്ളിയുടെ ഭൂമിയില്‍ ശ്മശാനം നിര്‍മിക്കുന്നതുമായി ബന്ധപ്പെട്ട് തര്‍ക്കം നിലനില്‍ക്കുന്നുണ്ടായിരുന്നു. ഇതിനിടയിലാണ് ഇന്നലെ പുലര്‍ച്ചെ പള്ളിക്കുനേരെയും വൈദികനെതിരേയും ആക്രമണം ഉണ്ടായത്. സംഭവമറിഞ്ഞ് രാവിലെ മുതല്‍ വിവിധ പ്രദേശങ്ങളില്‍ നിന്ന് വിശ്വാസികള്‍ തടിച്ചുകൂടി പ്രതിഷേധിച്ചു. മുന്‍ മുഖ്യമന്ത്രി ഉമ്മന്‍ ചാണ്ടി, മന്ത്രി ജി.സുധാകരന്‍, ആര്‍ രാജേഷ് എം.എല്‍.എ , പ്രതിപക്ഷ നേതാവ് രമേശ് ചെന്നിത്തല, ചെങ്ങന്നൂര്‍ ഉപതെരഞ്ഞെടുപ്പിലെ സ്ഥാനാര്‍ത്ഥികളായ സജി ചെറിയാന്‍, ഡി.വിജയകുമാര്‍, ദേവസ്വം ബോര്‍ഡ് മെംബര്‍ കെ.രാഘവന്‍, വിവിധ കക്ഷി നേതാക്കള്‍,സാമൂഹ്യ സാംസ്‌ക്കാരിക നേതാക്കള്‍ തുടങ്ങിയവര്‍ പള്ളിയിലെത്തി ആക്രമണത്തെ അപലപിച്ചു.പ്രദേശത്ത് സമാധാന അന്തരീക്ഷം തകര്‍ത്ത് വര്‍ഗീയമായ പ്രശ്‌നങ്ങള്‍ ഉണ്ടാക്കാന്‍ ശ്രമിക്കുന്ന ആര്‍.എസ്.എസ് നടപടിയില്‍ സ്ഥലം എം.എല്‍.എ കൂടിയായ ആര്‍.രാജേഷ് പ്രതിഷേധിച്ചു.
പള്ളിക്ക് നേരെ ആക്രമണം നടത്തിയതിന് പിന്നില്‍ ആര്‍.എസ്. എസ് പ്രവര്‍ത്തകരാണന്നും സമാധാനമായി ജീവിക്കുന്ന പ്രദേശത്തെ ജനങ്ങളെ ഭിന്നിപ്പിക്കാനുള്ള നടപടിയില്‍ പ്രതിപക്ഷ നേതാവ് രമേശ് ചെന്നിത്തല പ്രതിഷേധിച്ചു. കുറ്റവാളികളെ നിയമത്തിന് മുന്നില്‍ കൊണ്ടുവരണമെന്നും പള്ളിക്ക് നേരെ നടന്ന ആക്രമണത്തില്‍ പ്രതിഷേധിക്കുന്നതായും ഉമ്മന്‍ ചാണ്ടി പറഞ്ഞു.
പള്ളിക്ക് നേരെയും വൈദികനെതിരേയും നടന്ന ആക്രമണത്തിലെ പ്രതികള്‍ക്കെതിരേ മുഖം നോക്കാതെ നടപടി സ്വീകരിക്കുമെന്നും നാട്ടില്‍ സമാധാന അന്തരീക്ഷ തകര്‍ക്കാന്‍ ആരെയും അനുവദിക്കില്ലെന്നും മന്ത്രി ജി.സുധാകരന്‍ പറഞ്ഞു.