കൊച്ചി: കതിരൂര്‍ മനോജ് വധക്കേസില്‍ യു.എ.പി.എ ചുമത്തിയതിനെതിരേ സി.പി.എം കണ്ണൂര്‍ ജില്ലാ സെക്രട്ടറി പി.ജയരാജന്‍ ഹൈക്കോടതിയില്‍ അപ്പീല്‍ നല്‍കി. സി.ബി.ഐ യു.എ.പി.എ ചുമത്തിയത് സംസ്ഥാന സര്‍ക്കാരിന്റെ അനുമതിയില്ലാതെയാണെന്ന് ആരോപിച്ച് നേരത്തെ നല്‍കിയ ഹരജി സിംഗിള്‍ബെഞ്ച് തള്ളിയിരുന്നു. ഇതിനെതിരേയാണ് ഡിവിഷന്‍ ബെഞ്ചിന് മുമ്പാകെ ജയരാജന്‍ അപ്പീല്‍ നല്‍കിയത്.

ആര്‍.എസ്.എസ് നേതാവായ മനോജിനെ 2014 സെപ്തംബര്‍ ഒന്നിന് സി.പി.എം പ്രവര്‍ത്തകര്‍ ആക്രമിച്ച് കൊലപ്പെടുത്തിയെന്നാണ് കേസ്. സംഭവത്തിന്റെ ഗൂഢാലോചനക്കേസില്‍ പി.ജയരാജന്‍ ഉള്‍പ്പെടെ ആറു പേരെ പ്രതിയാക്കിയാണ് സി.ബി.ഐ കുറ്റപത്രം നല്‍കിയത്. വധക്കേസില്‍ 25ാം പ്രതിയാണ് പി.ജയരാജന്‍.