ന്യൂഡല്‍ഹി: അപകീര്‍ത്തി കേസുമായി ബന്ധപ്പെട്ട് ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന്റെ മാപ്പപേക്ഷ കേന്ദ്ര ധനമന്ത്രി അരുണ്‍ ജയ്റ്റ്‌ലി സ്വീകരിച്ചു. കെജ്‌രിവാളിനെതിരേയും എ.എ.പി നേതാക്കള്‍ക്കെതിരേയും പത്ത് കോടിയുടെ അപകീര്‍ത്തിക്കേസായിരുന്നു ധനമന്ത്രി ഫയല്‍ ചെയ്തിരുന്നത്.
കഴിഞ്ഞ ഡിസംബറിലായിരുന്നു ജയ്റ്റിലിക്കെതിരേയുള്ള ആരോപണം. ഡല്‍ഹി ക്രിക്കറ്റ് അസോസിയേഷന്‍ പ്രസിഡന്റായിരിക്കെ ജയ്റ്റിലി വന്‍ അഴിമതി നടത്തിയെന്ന് ആരോപിച്ചതിനെ തുടര്‍ന്നാണ് അപകീര്‍ത്തി കേസ് നല്‍കിയത്. കെജ്‌രിവാളിന്റെ മാപ്പപേക്ഷയുടെ പശ്ചാത്തലത്തില്‍ അപകീര്‍ത്തി കേസ് ജയ്റ്റിലി പിന്‍വലിച്ചേക്കുമെന്ന് അദ്ദേഹവുമായി ബന്ധപ്പെട്ട വൃത്തങ്ങള്‍ അറിയിച്ചു.
വ്യത്യസ്ത രാഷ്ട്രീയ പാര്‍ട്ടികളില്‍ വിശ്വസിക്കുന്നവരാണ് നമ്മള്‍ രണ്ട്‌പേരെങ്കിലും നമുക്കിടയിലെ നീരസം തുടരാന്‍ താല്‍പര്യപ്പെടുന്നില്ല. പിണക്കം മറന്ന് ജനങ്ങളെ സേവിക്കാന്‍ കൂടുതല്‍ ഇടപെടാമെന്ന് കെജ്‌രിവാള്‍ ജയ്റ്റിലിക്കയച്ച കത്തില്‍ ചൂണ്ടിക്കാട്ടി. ചില തെറ്റായ വിവരങ്ങളുടെ അടിസ്ഥാനത്തിലാണ് ആരോപണം ഉന്നയിച്ചതെന്നും അതില്‍ വസ്തുതയില്ലെന്ന് ബോധ്യമായതിന്റെ അടിസ്ഥാനത്തിലാണ് ആരോപണങ്ങള്‍ പിന്‍വലിക്കുന്നതെന്ന് കെജ്‌രിവാള്‍ കത്തില്‍ പറയുന്നുണ്ട്. എ.എ.പി നേതാക്കളായ രാഘവ് ഛദ്ദ , കുമാര്‍ വിശ്വാസ്, അശുതോഷ്, സഞ്ജയ് സിങ്, ദീപക് ബാജ്‌പെയ് എന്നിവര്‍ക്കതിരെയും ജയ്റ്റിലി കേസ് കൊടുത്തിരുന്നു. പ്രമുഖ അഭിഭാഷകനായ രാം ജഠ്മലാനിയോടും കെജ്‌രിവാള്‍ മാപ്പു പറഞ്ഞു. ജയ്റ്റ്‌ലിക്കെതിരേയുള്ള കേസില്‍ കെജ്‌രിവാളിനായി കോടതിയില്‍ ഹാജരായത് ജഠ്മലാനിയയായിരന്നു. നേരത്തെ നിതിന്‍ ഗഡ്കരി, കോണ്‍ഗ്രസ് നേതാവ് കപില്‍ സിബല്‍, മകന്‍ അമിത സിബല്‍, അകാലിദള്‍ നേതാവ് ബിക്രം സിങ് മജീതിയ തുടങ്ങിയവരോട് കെജ്‌രിവാള്‍ മാപ്പ് പറഞ്ഞിരുന്നു.