ജിദ്ദ: വിമാനകമ്പനികളില്‍ സഊദിവല്‍ക്കരണം നിര്‍ബന്ധമാക്കണമെന്ന് വ്യോമയാന മേഖലയില്‍ പ്രവര്‍ത്തിക്കുന്ന സഊദികളും വിദഗ്ധരും. നിലവില്‍ വിദേശികളെ ജോലിക്കു വയ്ക്കുന്നതിനാണ് കമ്പനികള്‍ താല്‍പര്യം കാണിക്കുന്നത്. ഇതിനു പരിഹാരം കാണുന്നതിന് സഊദിവല്‍ക്കരണം നിര്‍ബന്ധമാക്കുകയല്ലാതെ വഴിയില്ല.
ഏവിയേഷന്‍ മേഖലയുമായി ബന്ധപ്പെട്ട തൊഴില്‍ മേഖലകളിലെ കോഴ്‌സുകള്‍ പൂര്‍ത്തിയാക്കിയ നിരവധി സഊദികള്‍ തൊഴില്‍രഹിതരായി കഴിയുന്നുണ്ട്.
വിമാന കമ്പനികളില്‍ ജോലി ലഭിക്കുന്നത് ഇവര്‍ കാത്തിരിക്കുകയാണ്. എന്നാല്‍ കമ്പനികള്‍ വിദേശികള്‍ക്ക് മുന്‍ഗണന നല്‍കുന്നതിനാല്‍ ഇവര്‍ക്ക് തൊഴിലവസരങ്ങ നഷ്ടമാവുന്നു.
സഊദി ഉദ്യോഗാര്‍ഥികള്‍ക്ക് അനുയോജ്യമായ തൊഴില്‍ സാഹചര്യമാണ് വ്യോമയാന മേഖലയിലുള്ളത്. വ്യോമയാന മേഖലയിലെ നിരവധി തൊഴിലുകള്‍ സഊദിവല്‍ക്കരിക്കുന്നതിന് സാധിക്കും.
സഊദിയില്‍ വാണിജ്യ വിമാനങ്ങളും സ്വകാര്യ വിമാനങ്ങളുമടക്കം 500 ലേറെ വിമാനങ്ങളുണ്ടെന്ന് വ്യോമയാന മേഖലാ വിദഗ്ധന്‍ താരിഖ് അല്‍ഈദി പറഞ്ഞു.
വിമാന ജീവനക്കാരടക്കം നേരിട്ടു ജോലി ചെയ്യുന്നവരും സുരക്ഷാ, മെയിന്റനന്‍സ്, എയര്‍ ട്രാഫിക് കണ്‍ട്രോള്‍, ഓപ്പറേഷന്‍സ് അടക്കമുള്ള പരോക്ഷ മേഖലകളില്‍ ജോലി ചെയ്യുന്നവരുമടക്കം ചുരുങ്ങിയത് എഴുപതോളം പേര്‍ക്ക് ഓരോ വിമാനവും തൊഴിലവസരങ്ങള്‍ സൃഷ്ടിക്കുമെന്നും താരിഖ് പറഞ്ഞു.