സന്‍ആ: യമനില്‍ സഊദി സഖ്യസേന നടത്തിയ ആക്രമണത്തില്‍ നാട്ടുകാരടക്കം 12 മരണം. ഏഴ് കുട്ടികളും ഇതില്‍ ഉള്‍പ്പെടും. തീരനഗരമായ ഹുദൈദയിലാണ് സഖ്യസേന ഹൂതി വിമതരെ ലക്ഷ്യമിട്ട് ശക്തമായ ആക്രമണം നടത്തിയത്.
ഇവിടത്തെ അല്‍ ഹാലി ജില്ലയിലാണു സംഭവം. ആഭ്യന്തരയുദ്ധം രൂക്ഷമായ മറ്റു പ്രദേശങ്ങളില്‍നിന്ന് ഒഴിപ്പിച്ച ജനങ്ങളെ പാര്‍പ്പിച്ച മേഖലയാണിത്. കൊല്ലപ്പെട്ട 12 പേരും ഒരു കുടുംബത്തില്‍നിന്നുള്ളവരാണ്. ഇവരുടെ വീട് പൂര്‍ണമായും തകര്‍ന്നിട്ടുണ്ട്.
ഹൂതികളെ ലക്ഷ്യമിട്ടായിരുന്നു സഖ്യസേനയുടെ ആക്രമണമെന്നാണു കരുതപ്പെടുന്നത്. ഹുദൈദയില്‍ കഴിഞ്ഞ ദിവസം യു.എന്‍ സന്നദ്ധ സംഘത്തിന്റെ ഭക്ഷ്യവസ്തുക്കള്‍ സൂക്ഷിച്ച ഗോഡൗണ്ടില്‍ വന്‍ തീപ്പിടിത്തമുണ്ടായിരുന്നു.
സംഭവത്തില്‍ നാലോളം ഭക്ഷ്യപ്പുരകളാണു കത്തിനശിച്ചത്. യമനിലെ വിവിധ മേഖലയില്‍ വിവതരണം ചെയ്യാനെത്തിച്ചതായിരുന്നു ഇവിടെയുണ്ടായിരുന്ന ഭക്ഷ്യവസ്തുക്കള്‍.