കണ്ണൂര്‍: സംസ്ഥാനത്തെ ആദിവാസികള്‍ നേരിടുന്ന പ്രശ്‌നങ്ങള്‍ക്ക് പരിഹാരം അവര്‍ക്ക് വിദ്യാഭ്യാസം നല്‍കുകയെന്നതാണെന്ന് സംസ്ഥാന സാക്ഷരതാ മിഷന്‍ ഡയറക്ടര്‍ ഡോ. പി.എസ് ശ്രീകല. സാക്ഷരതാ മിഷന്‍ നടപ്പാക്കുന്ന സാമൂഹിക സാക്ഷരതാ പദ്ധതി 'സമഗ്ര'യുമായി ബന്ധപ്പെട്ട് കോളയാട് പഞ്ചായത്തിലെ മണ്ഡപം കോളനിയിലെ ആദിവാസി പഠിതാക്കളോട് സംസാരിക്കുകയായിരുന്നു അവര്‍.
വിദ്യാഭ്യാസത്തിലൂടെ ചൂഷണത്തിനും തൊഴിലില്ലായ്മയ്ക്കും മാത്രമല്ല, മദ്യപാനം പോലുള്ള ശീലങ്ങളിലും മാറ്റമുണ്ടാക്കാന്‍ സാധിക്കുമെന്നും അവര്‍ പറഞ്ഞു. കണ്ണവം വിദ്യാകേന്ദ്രം, ന്യൂമാഹി വികസന കേന്ദ്രം എന്നിവയും സന്ദര്‍ശിച്ചു. കോളയാട്, പേരാവൂര്‍, പടിയൂര്‍, ആറളം, നടുവില്‍ പഞ്ചായത്തുകളിലാണ് ഇപ്പോള്‍ പദ്ധതി നടപ്പാക്കുന്നത്. പദ്ധതിയുടെ ഭാഗമായി പ്രേരക്മാര്‍ക്ക് പരിശീലനം നല്‍കിക്കഴിഞ്ഞു. സാക്ഷരതാ മിഷന്‍ ഡയറക്ടറോടൊപ്പം ജില്ലാ കോഓര്‍ഡിനേറ്റര്‍ ഷാജു ജോണ്‍, അസി. കോഓര്‍ഡിനേറ്റര്‍ മുഹമ്മദ് ബഷീര്‍, നോഡല്‍ പ്രേരക് റീത്ത എന്നിവരും ഉണ്ടായിരുന്നു.