ന്യൂഡല്‍ഹി: വ്യാജവാര്‍ത്തകള്‍ നല്‍കുന്ന മാധ്യമപ്രവര്‍ത്തകരുടെ അംഗീകാരം റദ്ദാക്കാനുള്ള കേന്ദ്രസര്‍ക്കാരിന്റെ വിവാദ നിര്‍ദേശം പിന്‍വലിച്ചു. വ്യാജ വാര്‍ത്ത ഉണ്ടാക്കുകയോ അത് പ്രചരിപ്പിക്കുകയോ ചെയ്യുന്ന മാധ്യമപ്രവര്‍ത്തകരുടെ അംഗീകാരം താല്‍ക്കാലികമായോ സ്ഥിരമായോ റദ്ദാക്കണമെന്ന വാര്‍ത്താവിനിമയ മന്ത്രാലയത്തിന്റെ നിര്‍ദേശമാണ് പിന്‍വലിച്ചത്. നിര്‍ദേശം പിന്‍വലിക്കാന്‍ പ്രധാനമന്ത്രി നരേന്ദ്രമോദി ആവശ്യപ്പെട്ടതായും പ്രസ്‌കൗണ്‍സില്‍ ഓഫ് ഇന്ത്യ മുഖേന മാത്രമേ ഇത്തരത്തിലുള്ള നടപടികള്‍ ഉണ്ടാവൂവെന്നും പ്രധാനമന്ത്രിയുടെ ഓഫിസ് (പി.എം.ഒ) അറിയിച്ചു.

വ്യാജവാര്‍ത്ത സംബന്ധിച്ച പരാതി ലഭിച്ചാലുടന്‍ പ്രസ് കൗണ്‍സില്‍ ഓഫ് ഇന്ത്യ അല്ലെങ്കില്‍ ന്യൂസ് ബ്രോഡ്കാസ്റ്റേഴ്‌സ് അസോസിയേഷന്‍ എന്നിവര്‍ക്ക് കൈമാറി കേന്ദ്രസര്‍ക്കാര്‍ ഉപദേശം തേടുമെന്നും 15 ദിവസത്തിനുളളില്‍ ഇതുസംബന്ധിച്ച റിപ്പോര്‍ട്ട് സമിതികള്‍ സര്‍ക്കാരിന് തിരികെ നല്‍കണമെന്നുമായിരുന്നു ഇന്നലെ വൈകീട്ടോടെ വാര്‍ത്താവിതരണമന്ത്രാലയം പുറപ്പെടുവിച്ച വാര്‍ത്താകുറിപ്പില്‍ പറഞ്ഞിരുന്നത്. സമിതികള്‍ റിപ്പോര്‍ട്ടുകള്‍ നല്‍കുന്നതുവരെ ആരോപിതരായ മാധ്യമപ്രവര്‍ത്തകരുടെ അംഗീകാരം മരവിപ്പിക്കുമെന്നുമായിരുന്നു മന്ത്രാലയം പറഞ്ഞിരുന്നത്. സംഭവം വന്‍വിവാദമാവുകയും ഇന്നലെ തന്നെ വിവിധ പത്രപ്രവര്‍ത്തക സംഘടനകള്‍ പ്രക്ഷോഭപരിപാടികള്‍ക്കു പദ്ധതിയിടുകയുംചെയ്തതിനു പിന്നാലെയാണ് വാര്‍ത്താകുറിപ്പ് പിന്‍വലിക്കാന്‍ പ്രധാനമന്ത്രിയുടെ ഓഫിസ് നിര്‍ദേശം നല്‍കിയത്.