ന്യൂഡല്‍ഹി: ഈ വര്‍ഷം ഇന്ത്യയില്‍ മഴയുടെ ലഭ്യതയില്‍ കുറവുണ്ടാകില്ലെന്ന് പ്രവചനം. ജൂണ്‍ മുതല്‍ സെപ്റ്റംബര്‍ വരെയുള്ള നാലുമാസ കാലയളവില്‍ സാധാരണ രീതിയിലുള്ള മണ്‍സൂണ്‍ ഉണ്ടാകുമെന്ന് സ്വകാര്യ കാലാവസ്ഥ പ്രവചന ഏജന്‍സിയായ സ്‌കൈമെറ്റ് പറയുന്നു. ജൂണ്‍ മാസത്തില്‍ ശക്തമായ മഴ ലഭിക്കുന്നതിന് സാധ്യതയുണ്ട്. ഇത് മുന്‍വര്‍ഷങ്ങളിലുള്ളതിനേക്കാള്‍   കൂടുതലായിരിക്കും.
ലോങ്ങ് പിരീഡ് ആവറേജ് (എല്‍.പി.എ) അനുസരിച്ച് ഒരു വര്‍ഷം 884 മില്ലിമീറ്റര്‍ മഴയാണ് ഇന്ത്യയില്‍ ലഭിക്കുന്നത്. ഇത്തവണ അതില്‍ വലിയ വ്യത്യാസം ഉണ്ടാകില്ലെന്നാണ് സ്‌കൈമെറ്റ് നടത്തിയ പഠനം വ്യക്തമാക്കിയിരിക്കുന്നത്. അഞ്ച് ശതമാനം വരെ മാത്രമാണ് പരമാവധി വിത്യാസം വരിക.
ഇത്തവണ രാജ്യത്ത് ഒരു ഭാഗത്തും വരള്‍ച്ചയ്ക്ക് സാധ്യതയില്ലെന്നും പഠനം നിരീക്ഷിക്കുന്നു. തെക്ക് പടിഞ്ഞാറന്‍ കാലവര്‍ഷം സാധാരണ രീതിയിലാകുന്നതിന് 80 ശതമാനത്തിലേറെ സാധ്യതയുണ്ട്. ജൂണില്‍ ലോങ്ങ് പിരീഡ് ആവറേജിനെക്കാള്‍ 96 മുതല്‍ 104 ശതമാനം വരെ മഴ ലഭിക്കും. ജൂലൈയില്‍ 97 ശതമാനം മഴ ലഭിക്കുമെന്നും സ്‌കൈമെറ്റ് പറയുന്നു.
ഇന്ത്യയില്‍ ബിഹാര്‍, ഒഡിഷ, ജാര്‍ഖണ്ഡ്, ബംഗാള്‍ സംസ്ഥാനങ്ങളില്‍ സാധാരണ ലഭിക്കുന്ന രീതിയില്‍ മഴ ലഭിക്കും.  ജൂണ്‍ മുതല്‍ സെപ്റ്റംബര്‍ വരെയുള്ള മാസങ്ങളില്‍ മുന്‍വര്‍ഷങ്ങളിലുണ്ടായിരുന്നതിനേക്കാള്‍ മഴയുടെ തോത്  70 ശതമാനംകണ്ട് വര്‍ധിക്കുമെന്നും പറയുന്നു.