മുക്കം: കിണറ്റില്‍ ചാടി ആത്മഹത്യ ചെയ്യാന്‍ ശ്രമിച്ച മറുനാടന്‍ തൊഴിലാളിയെ മുക്കം അഗ്‌നിരക്ഷാ സേന രക്ഷപ്പെടുത്തി. നേപ്പാള്‍ സ്വദേശി ദീപക്( 27) നെയാണ് മുക്കം അഗ്‌നി രക്ഷാസേന സാഹസികമായി രക്ഷപ്പെടുത്തിയത്. കഴിഞ്ഞദിവസം രാവിലെ 11ഓടെ കാരശ്ശേരി പഞ്ചായത്തിലെ കാലിക്കറ്റ് എസ്റ്റേറ്റിനു സമീപത്തെ കിണറ്റിലാണ് ഇയാള്‍ ചാടിയത്. രക്ഷപ്പെടുത്തുമ്പോള്‍ ദീപക്കിന്റെ കഴുത്തില്‍ വെള്ളം കോരാന്‍ ഉപയോഗിച്ചിരുന്ന കയര്‍ കുരുങ്ങിക്കിടന്നതായി സേനാംഗങ്ങള്‍ പറഞ്ഞു. കഴുത്തില്‍ കയര്‍ ചുറ്റിയ ശേഷം കിണറ്റില്‍ ചാടുകയായിരുന്നുവെന്നാണ് പ്രാഥമിക നിഗമനം. മണാശ്ശേരിയിലെ സ്വകാര്യ ആശുപത്രിയില്‍ ചികിത്സയില്‍ കഴിയുന്ന ദീപക് ഇതുവരെ സംസാരിച്ചിട്ടില്ല. ഭാര്യയുമായുണ്ടായ പിണക്കമാണ് ആത്മഹത്യാ ശ്രമത്തിന് കാരണമെന്ന് അയല്‍വാസികള്‍ പറഞ്ഞു.