കല്‍പ്പറ്റ: ജില്ലാ കലക്ടറേറ്റ് കോണ്‍ഫറന്‍സ് ഹാളില്‍ സംഘടിപ്പിച്ച വനിതാ കമ്മിഷന്‍ മെഗാ അദാലത്തില്‍ 37 പരാതികള്‍ പരിഗണിച്ചു.
തൊഴിലിടങ്ങളില്‍ നേരിടുന്ന പ്രശ്‌നങ്ങള്‍, ബിസിനസ് തര്‍ക്കം, ജാതി ഭ്രഷ്ട്, കുടുംബ കലഹം തുടങ്ങിയ കേസുകളാണ് പരിഗണിച്ചത്. പ്രണയിച്ച് വിവാഹിതരായവര്‍ക്ക് സമുദായം ഭ്രഷ്ട് ഏര്‍പ്പെടുത്തിയതു സംബന്ധിച്ച പരാതിയില്‍ സമുദായ നേതാക്കളെ വിളിച്ച് ചര്‍ച്ച നടത്താന്‍ കമ്മീഷന്‍ തീരുമാനിച്ചു.
വിഷയം മുഖ്യമന്ത്രിയുടെ ശ്രദ്ധയില്‍പെടുത്തും. വയനാട്ടിലെ പുഴകളെക്കുറിച്ച് ഗവേഷണം നടത്തുന്ന വിദ്യാര്‍ഥിനിയെ തിരുനെല്ലിയില്‍ വനം വകുപ്പ് ഉദ്യോഗസ്ഥര്‍ തടഞ്ഞു നിര്‍ത്തി സ്ത്രീത്വത്തെ അപമാനിക്കും വിധം ചോദ്യം ചെയ്തതുമായി ബന്ധപ്പെട്ട പരാതിയും ലഭിച്ചു. വനിതാ കമ്മിഷന്‍ അധ്യക്ഷ എം.സി ജോസഫൈന്‍, അംഗം അഡ്വ. ഷിജി ശിവജി എന്നിവരുടെ നേതൃത്വത്തിലാണ് അദാലത്ത് നടന്നത്.
19 കേസുകളില്‍ ഇരു കക്ഷികളും ഹാജരായി. മൂന്നു കേസുകളില്‍ തീര്‍പ്പായി. നാല് കേസുകള്‍ വിവിധ വകുപ്പുകളുടെ അന്വേഷണ റിപ്പോര്‍ട്ടിനായി അയക്കാന്‍ തീരുമാനിച്ചു.