പെരുമ്പാവൂര്‍: കണ്ടന്തറ ഗവ. യുപി സ്‌കൂളില്‍ അടച്ചു പൂട്ടിയ അങ്കണവാടി ഒരു മാസത്തേക്ക് തുറക്കാന്‍ തീരുമാനം. വെള്ളിയാഴ്ച വെങ്ങോല ഗ്രാമപഞ്ചായത്ത് ഓഫിസില്‍ പഞ്ചായത്ത് അധികാരികളും സ്‌കൂള്‍ അധികൃതരും നടത്തിയ ചര്‍ച്ചയിലാണ് ധാരണയായത്. ഒരു മാസത്തിനുള്ളില്‍ അനുയോജ്യമായ സ്ഥലം കണ്ടെത്തിയ ശേഷം അങ്കണവാടി മാറ്റി പ്രവര്‍ത്തിക്കും.
വെങ്ങോല പഞ്ചായത്തിലെ എട്ടാം വാര്‍ഡില്‍ 40 കുട്ടികള്‍ പഠിക്കുന്ന അങ്കവാടി വ്യാഴ്ച സ്‌കൂള്‍ അധികൃതര്‍ അടച്ചു പൂട്ടുകയായിരുന്നു. സ്‌കൂള്‍ പ്രവര്‍ത്തിക്കുന്ന കെട്ടിടത്തില്‍ അങ്കണവാടിയും പ്രവര്‍ത്തിക്കുന്നതിനാല്‍ സ്ഥലം സൗകര്യമില്ലെന്ന കാരണം ചൂണ്ടികാട്ടിയാണ് അടച്ചുപൂട്ടലുണ്ടായത്. ഇതിനെതിരെ രക്ഷിതാക്കള്‍ രംഗത്തെത്തിയിരുന്നു.
ചര്‍ച്ചയില്‍ ഗ്രാമപഞ്ചായത്ത് പ്രസിഡന്റ് ധന്യ ലെജു, വൈസ് പ്രസിഡന്റ് പി എ മുക്താര്‍, സെക്രട്ടറി റെജി കുമാര്‍, പഞ്ചായത്തംഗങ്ങളായ കെ എം ഷംസുദ്ദീന്‍, സി വി മുഹമ്മദാലി, ഹെഡ്മാസ്റ്റര്‍ ബേബി ജോണ്‍, എച്ച്എംസി അംഗം കെ എ മാഹിന്‍കുട്ടി എന്നിവര്‍ പങ്കെടുത്തു.