തുറവൂര്‍: ദേശീയപാതയോരത്തെ മാലിന്യം നീക്കം ചെയ്ത് പൂന്തോട്ടം നിര്‍മിക്കുന്നു. കുത്തിയതോട് കേന്ദ്രീകരിച്ച് പ്രവര്‍ത്തിക്കുന്ന വോയ്‌സ് ഓഫ് കുത്തിയതോട് എന്ന വാട്‌സാപ് കൂട്ടായ്മയാണ് പാതയോരം വൃത്തിയാക്കി ദേശീയപാതയോരത്തും സ്‌കൂള്‍ പരിസരത്തും പൂന്തോട്ടങ്ങളൊരുക്കുന്നത്. മാലിന്യങ്ങള്‍ നീക്കം ചെയ്തശേഷമാണ് ചെടികള്‍ നട്ടുപിടിപ്പിക്കുന്നത്.
അരൂര്‍ മുതല്‍ ഒറ്റപ്പുന്നവരെയുള്ള പാതയോരത്തെ സ്‌കൂള്‍ പരിസരങ്ങള്‍ മാലിന്യം നിറഞ്ഞു ദുര്‍ഗന്ധം വമിക്കുന്നുണ്ട്. ഇത് വിദ്യാര്‍ഥികളുള്‍പ്പെടെയുള്ള കാല്‍നടയാത്രക്കാര്‍ക്ക് ബുദ്ധിമുട്ട് സൃഷ്ടിക്കുന്നുണ്ട്. ഇതിനെതിരേ യാതൊരു നടപടിയും അധികൃതര്‍ സ്വീകരിക്കാത്തതിനാലാണ് കൂട്ടായ്മ പാതയോരം വൃത്തിയാക്കുന്നത്. ചെടികളുടെ പരിപാലനവും സംരക്ഷണവും കുട്ടികളെ ഏല്‍പിക്കാനാണ് ഉദ്ദേശിക്കുന്നത്.
പദ്ധതിയുടെ തുടക്കമെന്ന നിലയില്‍ കോടംതുരുത്ത് വി.വി ഹയര്‍ സെക്കന്‍ഡറി സ്‌കൂളിന്റെ എതിര്‍വശത്തെ മാലിന്യങ്ങള്‍ നിക്കം ചെയ്തു. ഡോ. രഞ്ജിത്ത് മോനായി ഉദ്ഘാടനം ചെയ്തു.