മുഷ്താഖ് കൊടിഞ്ഞി

തിരൂരങ്ങാടി: ദേശീയപാത വികസിപ്പിക്കുമ്പോള്‍ കിടപ്പാടം നഷ്ടപ്പെടുന്നവരുടെ ഹൃദയംപൊട്ടിയുള്ള വിലാപങ്ങള്‍ കേള്‍ക്കാന്‍ അധികൃതര്‍ തയാറാകുന്നില്ല. വന്‍ പൊലിസ് സന്നാഹവുമായെത്തി കാല്‍ച്ചുവട്ടില്‍ ആണിയടിക്കുമ്പോള്‍ നിസഹായരായി കണ്ണീരോടെ വിലപിക്കുകയാണ് ദേശീയപാതയോരത്തെ വീട്ടുകാര്‍.
ഇന്നലെ ഡെപ്യൂട്ടി കലക്ടര്‍ ജെ.ഒ അരുണിന്റെ നേതൃത്വത്തില്‍ രാവിലെ ഏഴിനുതന്നെ സര്‍വേ ആരംഭിച്ചു. കരുമ്പില്‍ മുതല്‍ കൊളപ്പുറംവരെ നാലു വിഭാഗമങ്ങളായി തിരിഞ്ഞാണ് സര്‍വേ നടത്തിയത്. വീടുകള്‍ ഉള്‍പ്പെടുന്ന സ്ഥലങ്ങളില്‍നിന്നെല്ലാം സര്‍വേ ഉദ്യോഗസ്ഥരും പൊലിസും ഏറെ എതിര്‍പ്പുകള്‍ നേരിടേണ്ടി വന്നു. എന്നാല്‍, എല്ലാ എതിര്‍പ്പുകളെയും നേരിടാന്‍ എം.എസ്.പി, കെ.എ.പി, ഡി.ജി.പിയുടെ നോര്‍ത്ത് സോണ്‍ സ്‌ക്വാഡ് തുടങ്ങി മുന്നൂറംഗ പൊലിസ് സംഘമാണ് സ്ഥലത്തു ക്യാംപ് ചെയ്യുന്നത്.
എതിര്‍പ്പുകളുമായി മുന്നോട്ടുവരുന്നവരുടെ വീഡിയോ ദൃശ്യങ്ങളും പൊലിസ് റെക്കോര്‍ഡ് ചെയ്യുന്നുണ്ട്. ഇന്നു കൊളപ്പുറം മുതല്‍ വലിയപറമ്പുവരെ നാലു കിലോമീറ്റര്‍ സര്‍വേ നടത്തും.