പാലക്കാട്: ജില്ലാ ആശുപത്രി ഒ.പി വിഭാഗം വിപുലമാക്കുന്നതിന് ആര്‍ദ്രം പദ്ധതിയുടെ ഭാഗമായി 92 ലക്ഷം രൂപയുടെ ഭരണാനുമതിയായി. ജില്ലാ ആശുപത്രിയില്‍ ഒ.പി വിഭാഗത്തില്‍ ഓണ്‍ലൈന്‍ ബുക്കിങ്ങ് നടപ്പാക്കാനുള്ള പ്രാരംഭ നടപടികള്‍ ആരോഗ്യവകുപ്പ് നടപ്പാക്കി വരികയാണ്.
ഓണ്‍ലൈന്‍ ബുക്കിങ് നടപ്പായാല്‍ രോഗികള്‍ക്ക് നീണ്ട നിരയില്‍ നിന്ന് പരിശോധനക്ക് വിധേയമാകേണ്ടതില്ല. ടോക്കണില്‍ സൂചിപ്പിച്ച സമയത്ത് രോഗികള്‍ ആശുപത്രിയില്‍ എത്തിയാല്‍ മതി. രോഗികള്‍ക്ക് വിവിധ വകുപ്പുകള്‍ കയറിയിറങ്ങാതെ ലാബ് റിപ്പോര്‍ട്ടുകള്‍ പ്രത്യേക കൗണ്ടര്‍ വഴി ലഭ്യമാക്കാനുള്ള രീതിയും പദ്ധതിയുടെ ഭാഗമായി ആവിഷ്‌കരിക്കും.
ജില്ലാ ആശുപത്രിയില്‍ ഉള്‍പ്പെടെ ആര്‍ദ്രം പദ്ധതിപ്രകാരം 39 ഡോക്ടര്‍മാരെ ജില്ലയില്‍ അധികമായി നിയമിച്ചിട്ടുണ്ട്. ഇ.സി.ജി, ലാബ് ടെക്‌നിഷന്‍മാരെ കൂടുതലായി നിയമിച്ചിട്ടുണ്ട്.