ശിവകാശി: തമിഴ്‌നാട്ടിലെ ശിവകാശിയില്‍ രണ്ട് പടക്ക നിര്‍മാണ ശാലകളിലുണ്ടായ സ്‌ഫോടനത്തില്‍ നാലുപേര്‍ മരിച്ചു. പടക്കങ്ങള്‍ക്കായി വെടിമരുന്ന് തയാറാക്കുമ്പോഴാണ് സ്‌ഫോടനമുണ്ടായതെന്നാണ് വിവരം. രാമുത്തവന്‍പട്ടിയിലെ ഫാക്ടറിയില്‍ രാസവസ്തുക്കള്‍ കൂട്ടിക്കലര്‍ത്തുന്നതിനിടയിലുണ്ടായ സ്‌ഫോടനത്തില്‍ രണ്ടുപേരാണ് മരിച്ചത്. മൂന്നുപേര്‍ക്ക് സാരമായി പരുക്കേല്‍ക്കുകയും ചെയ്തു. കാക്കിവാടന്‍പട്ടിയിലുണ്ടായ മറ്റൊരു സ്‌ഫോടനത്തിലാണ് രണ്ടുപേര്‍ മരിച്ചത്. പടക്കത്തില്‍ മരുന്ന് നിറയ്ക്കുമ്പോഴാണ് പൊട്ടിത്തെറിയുണ്ടായതെന്ന് പൊലിസ് അറിയിച്ചു. പരുക്കേറ്റവരെ ആശുപത്രിയില്‍ പ്രവേശിപ്പിച്ചു.