ലണ്ടന്‍: യുവേഫ യൂറോപ്പ ലീഗിന്റെ ക്വാര്‍ട്ടര്‍ ഫൈനല്‍ ആദ്യപാദ മത്സരത്തില്‍ ആഴ്‌സണലിന് വമ്പന്‍ ജയം. ഒന്നിനെതിരേ നാല് ഗോളുകള്‍ക്ക് റഷ്യന്‍ ക്ലബായ സി.എസ്.കെ.എ മോസ്‌ക്കോയെ ആഴ്‌സണല്‍ പരാജയപ്പെുത്തി. ആരോണ്‍ റാംസി, ലക്കാസറ്റെ എന്നിവരുടെ ഇരട്ട ഗോളുകളാണ് ഗണ്ണേഴ്‌സിന്റെ ജയം അനായാസമാക്കിയത്. ആദ്യ പകുതിയില്‍ തന്നെ ആഴ്‌സണല്‍ നാല് ഗോളുകളും വലയിലാക്കി കരുത്ത് തെളിയിച്ചു. ഒന്‍പതാം മിനുട്ടില്‍ റാംസിയിലൂടെ ആഴ്‌സണല്‍ ലീഡെടുത്തപ്പോള്‍ 15ാം മിനുട്ടില്‍ സി.എസ്.കെ.എ തിരിച്ചടിച്ചു. എന്നാല്‍ പിന്നീട് മൂന്ന് ഗോളുകള്‍ തുടരെ നേടിയാണ് ഗണ്ണേഴ്‌സ് സെമി സാധ്യത സജീവമാക്കിയത്. മറ്റൊരു മത്സരത്തില്‍ എതിരില്ലാത്ത രണ്ട് ഗോളുകള്‍ക്ക് അത്‌ലറ്റിക്കോ മാഡ്രിഡ് സ്‌പോര്‍ടിങിനെ വീഴ്ത്തി. ഗ്രിസ്മാനും കോക്കെയുമാണ് അത്‌ലറ്റിക്കോയ്ക്കായി വല ചലിപ്പിച്ചത്.