കോഴിക്കോട്: കേരള ഫുട്ബാളിന്റെ പ്രൗഢിയും പ്രശസ്തിയും വാനോളം ഉയര്‍ത്തി 14 വര്‍ഷത്തിന് ശേഷം കേരളം സന്തോഷ്‌ട്രോഫി ഫുട്ബാള്‍ ടൂര്‍ണമെന്റില്‍ ജേതാക്കളായതില്‍ ആഹ്ലാദം പ്രകടിപ്പിച്ച് നഗരത്തില്‍ വിജയദിനം ആഘോഷിച്ചു.
ഇതിന്റെ ഭാഗമായി നടന്ന ഘോഷയാത്രയില്‍ വിശിഷ്ട വ്യക്തികളും അക്കാദമി താരങ്ങളും അണിനിരന്നു. ഇന്‍ഡോര്‍ സ്‌റ്റേഡിയത്തില്‍ നിന്നാരംഭിച്ച ഘോഷയാത്ര മാനാഞ്ചിറയിലാണ് സമാപിച്ചത്. റോളര്‍സ്‌കേറ്റിങ് താരങ്ങളും വാദ്യമേളങ്ങളും ഘോഷയാത്രയ്ക്ക് മിഴിവേകി. തുടര്‍ന്ന് നടന്ന വിജയദിനാഘോഷം മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്തു.
ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് കെ.ജെ മത്തായി അധ്യക്ഷനായി. ജില്ലാ സെക്രട്ടറി പ്രേമന്‍ തറവട്ട്, പി.വി ഗംഗാധരന്‍, എഴുത്തുകാരന്‍ വി.ആര്‍ സുധീഷ്, കേരള പത്രപ്രവര്‍ത്തക യൂനിയന്‍ പ്രസിഡന്റ് കമാല്‍വരദൂര്‍, മുന്‍ സന്തോഷ്‌ട്രോഫി താരങ്ങളായ ഹാരിസ് റഹ്മാന്‍, സി.കെ ജയചന്ദ്രന്‍, കെ. അഷ്‌റഫ്, കെ.ടി.സി അബ്ദുല്ല, സാവിത്രി ശ്രീധരന്‍, സരസ ബാലുശ്ശേരി, കെ.ഡി.എഫ്.എ സെക്രട്ടറി പി. ഹരിദാസ്, ജോയന്റ് സെക്രട്ടറി പി. മമ്മദ്‌കോയ സംസാരിച്ചു.