തിരുവനന്തപുരം: മെഡിക്കല്‍ പ്രവേശനം സാധൂകരിച്ചുകൊണ്ടുള്ള ഓര്‍ഡിനന്‍സ് സുപ്രിംകോടതി സ്റ്റേ ചെയ്തതിനെ നിയമപരമായി നേരിടുമെന്ന് കണ്ണൂര്‍ അഞ്ചരക്കണ്ടി മെഡിക്കല്‍ കോളജിലെ രക്ഷിതാക്കളും വിദ്യാര്‍ഥികളും അറിയിച്ചു. മെയ് ഏഴിന് സുപ്രിംകോടതി കേസ് പരിഗണിക്കുമ്പോള്‍ കക്ഷിചേരാന്‍ അവസരം ലഭിക്കുമെന്നാണ് പ്രതീക്ഷ. വിദ്യാര്‍ഥികളുടെ ഭാഗം കോടതികേട്ടാല്‍ കോളജിലെ 137 വിദ്യാര്‍ഥികള്‍ക്കും തുടര്‍ന്നുപഠിക്കാന്‍ കഴിയുമെന്നാണ് പ്രതീക്ഷ. വിധി മറിച്ചായാലും നിയമപോരാട്ടം തുടരും. 2016-17 വര്‍ഷം കോളജില്‍ പ്രവേശനം നേടിയ 150 പേരില്‍ അവശേഷിക്കുന്ന 137 പേരും ഓണ്‍ലൈനായി അപേക്ഷിച്ച് നീറ്റ് പരീക്ഷ എഴുതി യോഗ്യത നേടിയവരാണ്. മറ്റു സ്വാശ്രയ മെഡിക്കല്‍ കോളജുകളില്‍ പ്രവേശനം നേടിയ വിദ്യാര്‍ഥികളെക്കാള്‍ ഉയര്‍ന്ന റാങ്കുള്ളവരാണ് ഇപ്പോള്‍ പെരുവഴിയിലായിരിക്കുന്നതെന്നും ഇവര്‍ പറഞ്ഞു.
പ്രവേശനസമയത്ത് പല മെഡിക്കല്‍ കോളജുകളും ഒന്നേകാല്‍ കോടി വരെ കോഴ ചോദിച്ചെന്നും രക്ഷകര്‍ത്താക്കള്‍ ആരോപിച്ചു. എം.ഇ.എസ്, വയനാട് ഡി.എം, ബിലീവേഴ്‌സ് മെഡിക്കല്‍ കോളജുകള്‍ക്കെതിരേയാണ് രക്ഷകര്‍ത്താക്കര്‍ ആരോപണമുന്നയിച്ചിരിക്കുന്നത്. കണ്ണൂര്‍ മെഡിക്കല്‍ കോളജില്‍ അഡ്മിഷനായി 43.17 ലക്ഷം രൂപയാണ് കോഴ വാങ്ങിയതെന്നും രക്ഷിതാക്കള്‍ ആരോപിച്ചു.
പി.ടി.എ ഭാരവാഹികളായ മോഹനന്‍ കോട്ടൂര്‍, മഷ്‌റൂഖ്, കെ.ജി.പി നായര്‍, കെ. മോഹന്‍കുമാര്‍, ജേക്കബ് എബ്രഹാം എന്നിവരും വിദ്യാര്‍ഥികളും വാര്‍ത്താസമ്മേളനത്തില്‍ പങ്കെടുത്തു.