ബംഗളൂരു: കര്‍ണാടകയില്‍ ബി.ജെ.പിയുടെ വോട്ട് ബാങ്കുകളായി കണക്കാക്കുന്ന ലിംഗായത്തുകള്‍ ഇത്തവണ കോണ്‍ഗ്രസിനെ അനുകൂലിക്കും. ഇന്നലെ ലിംഗായത്ത് മതവിഭാഗത്തിലെ 30 ആത്മീയാചാര്യന്മാരുടെ യോഗത്തിലാണ് കോണ്‍ഗ്രസിനുള്ള പിന്തുണ അവര്‍ അറിയിച്ചത്. ലിംഗായത്തിന് ന്യൂനപക്ഷ മതപദവി നല്‍കിയത് കോണ്‍ഗ്രസാണെന്ന് വ്യക്തമാക്കിയാണ് അവര്‍ പിന്തുണ അറിയിച്ചത്.
1990 മുതല്‍ ലിംഗായത്തുകള്‍ ബി.ജെ.പിയെയാണ് പിന്തുണച്ചിരുന്നത്. നിയമസഭയിലെ 224 ല്‍ 123 സീറ്റുകളില്‍ സ്ഥാനാര്‍ഥികളെ വിജയിപ്പിക്കാനുള്ള ശേഷി ലിംഗായത്തുകള്‍ക്കുണ്ട്. ഉത്തര കര്‍ണാടകയില്‍ ശക്തമായ സ്വാധീനമുള്ള ലിംഗായത്ത് ആത്മീയ ആചാര്യ മാതെ മഹാദേവിയാണ് ഇന്നലെ ചേര്‍ന്ന യോഗത്തിന് ശേഷം മുഖ്യമന്ത്രി സിദ്ധരാമയ്യക്ക് പരസ്യമായി പിന്തുണ അറിയിച്ചത്. ലിംഗായത്തുകളുടെ ആവശ്യം അംഗീകരിച്ചത് സിദ്ധരാമയ്യ ആണ്.
അതുകൊണ്ട് അദ്ദേഹത്തെ പിന്തുണക്കാനാണ് തീരുമാനമെന്നും അവര്‍ പറഞ്ഞു. തങ്ങളെ ആരാണോ പിന്തുണക്കുന്നത് അവര്‍ക്ക് പിന്തുണ നല്‍കുകയെന്നതാണ് ലക്ഷ്യം. ഇപ്പോള്‍ തങ്ങള്‍ വര്‍ഷങ്ങളായി ആവശ്യപ്പെട്ട കാര്യം അംഗീകരിച്ചത് സിദ്ധരാമയ്യ ആണെന്ന് മറ്റൊരു ആത്മീയ നേതാവായ മുരുഗ രാജേന്ദ്ര സ്വാമി പറഞ്ഞു.