കൊല്ലം: പതിനാലുകാരിയായ എട്ടാം ക്ലാസ് വിദ്യാര്‍ഥിനിയെ തട്ടിക്കൊണ്ടു പോയി പീഡിപ്പിച്ച കേസില്‍ രണ്ടുപേര്‍ പിടിയില്‍. ഫേസ്ബുക്കിലൂടെ പരിചയപ്പെട്ട പെണ്‍കുട്ടിയെ വിവാഹ വാഗ്ദാനം നല്‍കി തമിഴ്‌നാട്ടിലെ തക്കല, നാഗര്‍കോവില്‍ എന്നീ സ്ഥലങ്ങളില്‍ കൊണ്ടു പോയി പീഡിപ്പിച്ച കേസില്‍ പാറശ്ശാല മുള്ളുവിളയില്‍ ഷഹാസ് മന്‍സിലില്‍ നഹാസ്(21), കൂട്ടാളിയും കന്യാകുമാരി ജില്ലയില്‍ തിരുവാംകോട് അണ്ണാനഗര്‍ സ്വദേശിയുമായ ബെന്‍സാത്ത്(20) എന്നിവരാണ് പിടിയിലായത്. പെണ്‍കുട്ടിയെ പ്രലോഭിപ്പിച്ചും അമ്മയെ ഭീഷണിപ്പെടുത്തിയുമാണ് പ്രതികള്‍ കുട്ടിയെ തമിഴ്‌നാട്ടിലേക്ക് കൊണ്ടുപോയതെന്ന് പൊലിസ് പറഞ്ഞു. വഴിമധ്യേ കുട്ടിയുടെ കൈയിലുണ്ടായിരുന്ന മൊബൈല്‍ഫോണ്‍ ഓഫാക്കുകയും തക്കല, നാഗര്‍കോവില്‍ തുടങ്ങിയ സ്ഥലങ്ങളിലെ ഉള്‍പ്രദേശങ്ങളില്‍ കൊണ്ടുപോയി തടവില്‍ പാര്‍പ്പിക്കുകയുമായിരുന്നു. കുട്ടിയുടെ ആഭരണം വിറ്റ പണവും പ്രതികള്‍ ചെലവാക്കി. പ്രതികള്‍ ചെന്നൈയിലേക്ക് കടക്കാന്‍ ശ്രമിക്കുമ്പോഴാണ് പൊലിസിന്റെ പിടിയിലാവുന്നത്. കോടതിയില്‍ ഹാജരാക്കിയ പ്രതികളെ 15 ദിവസത്തേക്ക് റിമാന്‍ഡ് ചെയ്തു. കൂടുതല്‍ പേര്‍ കേസിലുള്‍പ്പെട്ടിട്ടുണ്ടോയെന്നറിയാന്‍ പ്രതികളെ കസ്റ്റഡിയില്‍ വാങ്ങി ചോദ്യം ചെയ്യുമെന്നും പൊലിസ് അറിയിച്ചു.