കരുനാഗപ്പള്ളി: കൊല്ലം ജില്ലയിലെ വിവിധ കോളജുകള്‍ കേന്ദ്രീകരിച്ച് കഞ്ചാവ് എത്തിക്കുന്ന യുവാക്കള്‍ ആഡംബര ബൈക്കുമായി പിടിയിലായി.
കരുനാഗപ്പള്ളി എക്‌സൈസ് റേഞ്ച് ഓഫിസിലെ ഷാഡോ ടീമിന്റെ നിരീക്ഷണത്തിലായിരുന്ന വിദ്യാര്‍ഥികള്‍ക്ക് കഞ്ചാവ് എത്തിക്കുന്ന കടക്കല്‍ സ്വദേശികളായ വിഷ്ണു (28), അനീഷ് (30) എന്നിവരെയാണ് വാഹന പരിശോധനക്കിടെ വെളുത്ത മണല്‍ ഗവണ്‍മെന്റ് എന്‍ജിനീയറിങ് കോളജിന് സമീപത്തു നിന്ന് രണ്ടേ മുക്കാല്‍ കിലോ കഞ്ചാവുമായി ഇന്നലെ രാത്രിയോടെ പിടികൂടിയത്.രഹസ്യവിവരമനുസരിച്ചാണ് പ്രതികളെ പിടികൂടിയത്. എക്‌സൈസ് റേഞ്ച് ഇന്‍സ്‌പെക്ടര്‍ എ. ജോസ് പ്രതാപിന്റെ നേതൃത്വത്തില്‍ പ്രിവന്റീവ് ഓഫിസര്‍ അന്‍വര്‍, ഹരികൃഷ്ണന്‍, സി.ഇ.ഒമാരായ വിജു, ശ്യാംകുമാര്‍ എസ്, സജീവ് കുമാര്‍, ശ്യാംദാസ്, വി. ശ്യാംകുമാര്‍, ജിനു തങ്കച്ചന്‍ എന്നിവരടങ്ങുന്ന അന്വേഷണ സംഘമാണ് പ്രതികളെ പിടികൂടിയത്.