ചവറ: വായനയുടെ വസന്തകാലം തിരികെ എത്തിക്കാന്‍ ഗ്രാമ ഇടവഴികളില്‍ കുട്ടികള്‍ നടത്തിയ അക്ഷര യാത്ര ശ്രദ്ധേയമായി. പന്മന പേരുക്കര കൈരളി ഗ്രന്ഥശാലയുടെ നേതൃത്വത്തിലാണ് നൂറ് കണക്കിന് കുട്ടികള്‍ വായനയുടെ മഹത്വം എഴുതിയ പ്ലക്കാര്‍ഡുകളുമായി ഗ്രാമവാസികളെ ഉണര്‍ത്തിയത്.
താലൂക്ക് ലൈബ്രറി കൗണ്‍സില്‍ നടത്തുന്ന ഗ്രന്ഥശാലകള്‍ കാലത്തിനൊപ്പം മാറ്റത്തിനൊപ്പം എന്ന ആശയമേറ്റെടുത്താണ് കുട്ടികള്‍ ബോധവല്‍ക്കരണവുമായി തെരുവിലിറങ്ങിയത്.
നമുക്ക് ജാതിയില്ല, വിടരട്ടെ അക്ഷരപ്പൂവുകള്‍, ഗ്രന്ഥശാലകള്‍ നാടിന്‍ സര്‍വ്വകലാശാലകള്‍ തുടങ്ങിയ പ്ലക്കാര്‍ഡുമേന്തി ചെണ്ടമേളത്തിന്റെ അകമ്പടിയോടെ കുട്ടികള്‍ വീടുകള്‍ക്ക് മുന്നിലെത്തിയപ്പോള്‍ നാട്ടുകാര്‍ക്കും അക്ഷരയാത്ര കൗതുകത്തിനൊപ്പം ചിന്തയെ ഉണര്‍ത്തുന്നതായി.
പോരൂക്കര വാര്‍ഡിന്റെ വടക്കന്‍ മേഖലകളിലാണ് അക്ഷര യാത്ര പര്യടനം നടത്തിയത് താലൂക്ക് ലൈബ്രറി കൗണ്‍സില്‍ സെക്രട്ടറി വി വിജയകുമാര്‍ ഉദ്ഘാടനം ചെയ്തു. ടി.കെ രഘു അധ്യക്ഷത വഹിച്ചു. ഗ്രാമ പഞ്ചായത്ത് സ്ഥിരം സമിതി അധ്യക്ഷന്‍ കറുകത്തല ഇസ്മയില്‍, സന്തോഷ് തുപ്പാശ്ശേരി, ഗോപാലകൃഷ്ണന്‍, കെ.വി ദിലീപ്, ഡിജോ ഡിക്‌സണ്‍ സംസാരിച്ചു. വിജയന്‍, സ്റ്റീഫന്‍, വിശ്വമണി, ഡിക്‌സന്‍, റഷീദ്, ലോറന്‍സ്, വിശ്വനാഥന്‍ നേതൃത്വം നല്‍കി.