കോട്ടയം: പോലീസ് കസ്റ്റഡിയില്‍ കഴിയവേ മരിച്ച കാന്‍സര്‍ രോഗിയായ യുവാവിന്റെ കുടുംബത്തിന് ഉചിതമായ സമാശ്വാസം നല്‍കണമെന്ന് സംസ്ഥാന മനുഷ്യാവകാശ കമ്മീഷന്‍.2015 ഡിസംബര്‍ 15 ന് വിയ്യൂര്‍ സെന്‍ട്രല്‍ ജയിലില്‍ തടവില്‍ കഴിയവേ തൃശൂര്‍ മെഡിക്കല്‍ കോളേജിലാണ് വൈക്കം ഏഴുകാന്തുരുത്ത്കര സ്വദേശിയായ യുവാവ് മരിച്ചത്. യുവാവിന്റെ അമ്മ കുഞ്ഞമ്മ ഫയല്‍ ചെയ്ത കേസിലാണ് കമ്മീഷന്‍ അംഗം കെ. മോഹന്‍കുമാറിന്റെ ഉത്തരവ്.പട്ടികജാതി വിഭാഗത്തിലുള്ളയാളാണ് മരിച്ച യുവാവ്. കാപ്പ പ്രകാരമാണ് യുവാവിനെ അറസ്റ്റ് ചെയ്തത്.കമ്മീഷന്‍ കോട്ടയം ജില്ലാ പോലീസ് മേധാവിയില്‍ നിന്നും റിപ്പോര്‍ട്ട് ആവശ്യപ്പെട്ടിരുന്നു.
യുവാവ് സ്ഥിരമായി അക്രമപ്രവര്‍ത്തികളില്‍ ഏര്‍പ്പെടുന്നയാളാണെന്ന് റിപ്പോര്‍ട്ടില്‍ പറയുന്നു. കാന്‍സര്‍ രോഗം മൂര്‍ഛിച്ചാണ് മരിച്ചത്. എന്നാല്‍ പോലീസ് റിപ്പോര്‍ട്ട് ശരിയല്ലെന്ന് അമ്മ വാദിച്ചു. തുടര്‍ന്ന് കമ്മീഷന്‍ അന്വേഷണവിഭാഗത്തിലെ എസ്.പി പരാതിയെ കുറിച്ച് അന്വേഷിച്ചു.പരാതിക്കാരിയുടെ മകന് പോലീസ് മര്‍ദ്ദനം ഏറ്റെന്ന പരാതി തെളിയിക്കാന്‍ കഴിഞ്ഞിട്ടില്ലെന്ന് എസ്.പിയുടെ റിപ്പോര്‍ട്ടില്‍ പറയുന്നു.
പരാതിക്കാരിയുടെ മകന്‍ കസ്റ്റഡിയില്‍ അല്ലായിരുന്നെങ്കില്‍ മതിയായ ചികിത്സ ലഭിക്കുമായിരുന്നുവെന്ന് കമ്മീഷന്‍ ചൂണ്ടികാണിച്ചു. എങ്കില്‍ അയാള്‍ ഇപ്പോഴും ജീവിച്ചിരിക്കുമായിരുന്നു. രേഖകള്‍ അനുസരിച്ച് പരാതിക്കാരിയുടെ മകന്‍ പോലീസ് കസ്റ്റഡിയിലിരിക്കെയാണ് മരിച്ചത്. കസ്റ്റഡിയില്‍ ഇരിക്കവേ മരിക്കുന്നവരുടെ ആശ്രിതര്‍ക്ക് നല്‍കുന്ന സമാശ്വാസത്തിന് പരാതിക്കാരിയും അര്‍ഹയാണെന്ന് കമ്മീഷന്‍ ചൂണ്ടികാണിച്ചു.
പരാതിക്കാരിയുടെ കുടുംബത്തിന് ഉചിതമായ സമാശ്വാസം നല്‍കണമെന്ന് കമ്മീഷന്‍ ആവശ്യപ്പെട്ടു. ഉത്തരവ് ആഭ്യന്തരവകുപ്പ് സെക്രട്ടറിക്കും ജയില്‍ മേധാവിക്കും അയച്ചു.