ഇരിട്ടി: വീരാജ്‌പേട്ട പെരുമ്പാടി ചുരത്തില്‍ ബൈക്കും കാറും കൂട്ടിയിടിച്ച് ഇരിട്ടി സ്വദേശികളായ രണ്ട് യുവാക്കള്‍ക്ക് ഗുരുതര പരുക്ക്. ഇരിട്ടിക്കടുത്ത് പയഞ്ചേരി വായനശാലയ്ക്കു സമീപം രാമകൃഷ്ണാലയത്തില്‍ നിധിന്‍ രാജ്(26), സുഹൃത്തും സഹയാത്രികനുമായ പായംമുക്ക് ആനക്കുഴിയില്‍ തട്ടാന്‍കണ്ടി ഗോകുല്‍(25) എന്നിവര്‍ക്കാണ് പരുക്കേറ്റത്. ഇന്നലെ രാവിലെ എട്ടോടെ മൈസൂരുവില്‍നിന്നു നാട്ടിലേക്കു വരികയായിരുന്ന യുവാക്കള്‍ സഞ്ചരിച്ച ബൈക്കില്‍ പെരുമ്പാടി ചുരത്തില്‍ വച്ച് എതിരേ വന്ന കാര്‍ ഇടിക്കുകയായിരുന്നു. ബൈക്ക് കൊക്കയിലേക്ക് മറിഞ്ഞു. ഇടിച്ചിട്ട കാര്‍ നിര്‍ത്താതെ പോയി. പരുക്കേറ്റ് ചോര വാര്‍ന്ന യുവാക്കള്‍ റോഡില്‍ കിടന്ന് നിലവിളിച്ചെങ്കിലും ഇതുവഴി വന്ന വാഹനങ്ങള്‍ ആശുപത്രിയിലെത്തിക്കാന്‍ തയാറായില്ല. ചെങ്കല്‍ ലോഡിറക്കി വീരാജ്‌പേട്ടയില്‍ നിന്നു മടങ്ങി വരികയായിരുന്ന എ ടൂര്‍ സ്വദേശിയായ ഡ്രൈവറാണ് യുവാക്കളെ ഇരിട്ടി ആശുപത്രിയിലെത്തിച്ചത്. പരുക്ക് ഗുരുതരമായതിനാല്‍ ഇരുവരെയും കണ്ണൂര്‍ എ.കെ.ജി സഹകരണ ആശുപത്രിയില്‍ പ്രവേശിപ്പിച്ചു.