തിരുവനന്തപുരം: ദേശിയപാത നാലുവരി വികസനവുമായി ബന്ധപ്പെട്ട് കേരളത്തില്‍ ഒരിടത്തും സര്‍വെ നിറുത്തിവെയ്ക്കാന്‍ സര്‍ക്കാര്‍ നിര്‍ദ്ദേശം നല്‍കിയിട്ടില്ലെന്ന് പൊതുമരാമത്ത് മന്ത്രി ജി സുധാകരന്‍ അറിയിച്ചു. ചേര്‍ത്തല മുതല്‍ കഴക്കൂട്ടം വരെയുള്ള ഭാഗങ്ങളിലെ സര്‍വെയും കല്ലിടലും നിര്‍ത്തിവെച്ചതായി വരുന്ന പ്രചാരണണങ്ങള്‍ തെറ്റാണ്. നിശ്ചയിച്ച അലൈമെന്റിലെ പരാതിക്കിടയാക്കിയ ചില ഭാഗങ്ങള്‍ ജില്ലാ കലക്ടറുടെ നേതൃത്വത്തില്‍ പുന: പരിശോധിക്കണമെന്ന് മാത്രമാണ് നിര്‍ദ്ദേശിച്ചത്.
മലപ്പുറത്തെ പരാതി ചര്‍ച്ച ചെയ്യാന്‍ തിരുവനന്തപുരത്ത് ഏപ്രില്‍ 11ന് എം.പി, എം.എല്‍.എ, രാഷ്ട്രിയ പ്രതിനിധികള്‍ എന്നിവരുടെ യോഗം ചേരുന്നുണ്ട്. ഇക്കാര്യത്തില്‍ സര്‍ക്കാരിന് യാതൊരു വാശിയുമില്ല. വികസനം നഷ്ടപ്പെടരുതെന്ന് മാത്രമാണ് ഉദ്ദേശം. ഇല്ലാത്ത കാര്യങ്ങള്‍ സര്‍ക്കാരിന്റേതെന്ന രീതിയില്‍ പ്രചരിപ്പിച്ച് ജനങ്ങളെ തെറ്റിദ്ധരിപ്പിക്കുന്ന സമീപനത്തില്‍ നിന്ന് പിന്തിരിയണമെന്നും സുധാകരന്‍ ആവശ്യപ്പെട്ടു.