വടക്കാഞ്ചേരി: തെക്കുംകര പഞ്ചായത്തിലെ വിരുപ്പാക്കയില്‍ സ്ഥിതി ചെയ്യുന്ന പേരേപ്പാറ ഡാം 40 വര്‍ഷം നീണ്ട വ്യവഹാര നടപടികള്‍ക്കൊടുവില്‍ പഞ്ചായത്തു ഏറ്റെടുത്തു ബോര്‍ഡ് സ്ഥാപിച്ചു. സ്വകാര്യ വ്യക്തി കൈവശം വച്ചിരുന്ന 1.84 ഏക്കര്‍ സ്ഥലമാണു പഞ്ചായത്ത് ഏറ്റെടുത്തത്. ഇന്നലെ രാവിലെ നടന്ന ചടങ്ങില്‍ ഡോ. പി.കെ ബിജു എം.പി ഡാം ഏറ്റെടുത്തതായി പ്രഖ്യാപിച്ചു.
ജലസ്രോതസുകള്‍ സംരക്ഷിക്കേണ്ടതു കാലഘട്ടത്തിന്റെ ആവശ്യമാണെന്ന് എം.പി പറഞ്ഞു. ഇതിനു കഴിഞ്ഞില്ലെങ്കില്‍ ഭൂമുഖത്തു ജീവന്‍ നിലനിര്‍ത്തുക എന്നതു ദുഷ്‌കരമാകുമെന്നും എം.പി കൂട്ടിച്ചേര്‍ത്തു. തെക്കുംകര പഞ്ചായത്ത് പ്രസിഡന്റ് എം.കെ ശ്രീജ അധ്യക്ഷയായി.
ജില്ലാപഞ്ചായത്ത് പ്രസിഡന്റ് മേരി തോമസ് , പഞ്ചായത്ത് വൈസ് പ്രസിഡന്റ് സി.വി സുനില്‍കുമാര്‍, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷന്‍ എ.കെ സുരേന്ദ്രന്‍, പഞ്ചായത്ത് സ്ഥിരം സമിതി അധ്യക്ഷന്‍ കെ. പുഷ്പലത, ഇ.എന്‍ ശശി, സുജാത ശ്രീനിവാസന്‍, മെമ്പര്‍മാരായ വി.ജി സുരേഷ്, ഗീത വാസുദേവന്‍, സുനിതാകുമാരി, സി.പി.എം ലോക്കല്‍ സെക്രട്ടറിമാരായ എം.വി അരവിന്ദാക്ഷന്‍, ടി. പരമേശ്വരന്‍, കര്‍ഷക സംഘം ഏരിയാ സെക്രട്ടറി ടി.വി സുനില്‍ കുമാര്‍ സംസാരിച്ചു.
തുടര്‍ന്നു സി.പി.എം തക്കുംകര ഈസ്റ്റ് ലോക്കല്‍ കമ്മിറ്റിയുടെ നേതൃത്വത്തില്‍ ഡാമും പരിസരവും ശുചീകരിച്ചു. കഴിഞ്ഞ ദിവസം ഡാം പ്രദേശത്തെ മരങ്ങളുടെ ചമയ വിലയായി 410,000 രൂപ സ്ഥലം കൈവശമിരിക്കുന്ന വിരുപ്പാക്ക സ്വദേശി കൊച്ചുകുന്നേല്‍ ജെയ്ക്കബിനു കൈമാറിയിരുന്നു.
ഡാം വിട്ടുകൊടുത്തുകൊണ്ടു ജെയ്ക്കബ്ബ് കരാറില്‍ ഒപ്പുവെയ്ക്കുകയും ചെയ്തിരുന്നു. അടുത്ത ദിവസം ഡാമിലേയും പരിസരത്തേയും തേക്ക്, വീട്ടി തുടങ്ങിയ മരങ്ങള്‍ മുറിച്ച് വനം വകുപ്പിന്റെ ഡിപ്പോയിലേക്കു മാറ്റും.
ജലമൊഴുക്കിനു തടസമായി നില്‍ക്കുന്ന മരങ്ങള്‍ മാത്രമെ മുറിച്ചു മാറ്റുകയുള്ളൂ. ഡാമിന്റെ നിര്‍മാണം പൂര്‍ത്തിയായിട്ടു വര്‍ഷം 47 പിന്നിട്ടിട്ടും ഡാമും ഒരേക്കര്‍ എണ്‍പത്തി നാലര സെന്റ് സ്ഥലവും ഒഴിപ്പിച്ചെടുക്കുന്നതില്‍ അധികൃതര്‍ സമ്പൂര്‍ണ പരാജയമാണെന്ന് ആരോപണമുയര്‍ന്നിരുന്നു. സുപ്രഭാതമാണു ഈ അധികൃത അനാസ്ഥ പുറത്തു കൊണ്ടുവന്നത്.
1970ല്‍ ഡാം നിര്‍മാണം പൂര്‍ത്തിയാക്കുകയും അടുത്ത വര്‍ഷം കമ്മിഷന്‍ ചെയ്യാന്‍ തയാറെടുക്കുകയും ചെയ്യുമ്പോഴാണു ഡാമിനോടു ചേര്‍ന്ന മരങ്ങള്‍ ഉള്‍പ്പെടെയുള്ളവയ്ക്കു ചമയ വില നല്‍കണമെന്നു ആവശ്യപ്പെട്ടു വ്യവഹാര നടപടികള്‍ ആരംഭിച്ചത്.
വടക്കാഞ്ചേരി മുന്‍സിഫ് കോടതി, സബ് കോടതി, ഹൈക്കോടതി എന്നിവയില്‍ നാലര പതിറ്റാണ്ടായി കേസു നിലനില്‍ക്കുകയായിരുന്നു. 2016 നവംബര്‍ ഏഴിന് ഹൈക്കോടതി പുറപ്പെടുവിച്ച ഉത്തരവില്‍ നാലു മാസത്തിനുള്ളില്‍ ജില്ലാ കലക്ടറോട് തീരുമാനം ഉണ്ടാക്കാന്‍ നിര്‍ദേശിച്ചിരുന്നു.
ഇതിന്റെ അടിസ്ഥാനത്തില്‍ ജില്ലാ കലക്ടര്‍ 2017 നവംബര്‍ 18ന് ഉദ്യോഗസ്ഥരേയും പഞ്ചായത്ത് പ്രസിഡന്റ്, സെക്രട്ടറി എന്നിവരേയും പങ്കെടുപ്പിച്ചു യോഗം വിളിച്ചു ചേര്‍ക്കുകയും ഭൂമി ഏറ്റെടുക്കാനും ചമയവില സ്ഥലം കൈവശം വെച്ച വ്യക്തിയ്ക്കു നല്‍കാനും തീരുമാനം എടുക്കുകയും ചെയ്തു. ഇതിന്റെ അടിസ്ഥാനത്തിലാണു മുഴുവന്‍ തുകയും കൈമാറി ഡാം ഏറ്റെടുക്കല്‍ പൂര്‍ത്തിയാക്കിയത്.